Azərbaycan, Bakı, 06 avqust/ Trend , müxbir S.Babayeva/ Azərbaycanın rabitə və informasiya texnologiyaları naziri Əli Abbasov yerli telekommunikasiya şirkətlərinin adından istehsal və ixracatın inkişafı üçün güzəştlərin tətbiqi barədə ölkə prezidenti İlham Əliyevə müraciət edib.
"Bizim apardığımız təhlillər göstərir ki, telekommunikasiya avadanlığı üçün gömrük yığımları sistemində güzəştlərin tətbiqi və ixrac məhsullarının istehsalı üçün güzəştli kredit sisteminin yaradılması ixracatın inkişafına yeni təkan verə bilər", - nazir Nazirlər Kabinetinin prezident İlham Əliyevin sədrliyi ilə keçirilən, 2008-ci ilin I yarısında sosial-iqtisadi inkişafın yekunlarına həsr olunmuş iclasında bildirib.
Onun sözlərinə görə, xaricə məhsul ixracına başlamış yerli şirkətlər regional səviyyədə sərt rəqabətlə qarşılaşırlar. Region ölkələri telekommunikasiya məhsulları üçün sərfəli gömrük və vergi mühiti yaradıblar.
Nazir bununla əlaqədar yeni təkliflərin hazırlanması barədə sərəncam verilməsi üçün prezidentə müraicət edib.
Ölkənin Dövlət Statistika Komitəsinin məlumatlarına əsasən, I yarımil ərzində Azərbaycanda İT üzrə məhsul istehsalı və göstərilən İT xidmətlərinin həcmi 38,4 faiz artımla 354,8 mln. manata çatıb.
Müəlliflə əlaqə saxlamaq üçün elektron ünvan: [email protected]