Azərbaycan, Bakı, 24 dekabr/ Trend , müxbirlər S.Babayeva, N.İsmayılova/ "Azərbaycanda regional innovasiya zonasının (RİZ) yaradılması ölkənin bütün informasiya texnologiyaları sahəsini canlandıracaq", - rabitə və informasiya texnologiyaları naziri Əli Abbasov çərşənbə günü "2008-ci ilin prezident seçkiləri: yeni inkişaf perspektivləri" konfransında bildirib.
Onun sözlərinə görə, "bu, hökumətin başlıca layihəsidir və təsdiq olunacağı və parlament tərəfindən qəbul ediləcəyi təqdirdə, yüksək texnologiyalar sahəsində böyük canlanma baş verəcək".
RİZ layihəsi kiçik və orta innovasiya sahibkarlığının inkişafı üçün texnoparkların yaradılması, elektron avadanlıqlar və proqram məhsullarının istehsalı və ixracı üzrə regional bazanın yaradılması, ölkənin əlverişli tranzit informasiya mərkəzinə (Data Centre) çevrilməsini, formalaşan informasiya cəmiyyəti üçün insan ehtiyatlarının hazırlanması və inkişafı, müxtəlif sahələrdə informasiya texnologiyalarının tətbiqini nəzərdə tutur.
Abbasovun sözlərinə görə, layihə uğurla realizə olunarsa, ölkənin İT sahədən gəlirləri hazırki 1 mlrd. manatdan 2012-ci ildə 12 mlrd. manatadək artacaq, 2018 - ci ildə isə, bu göstərici ölkənin neft gəlirlərinə bərabər olacaq.
Bu gün RİZ layihəsi üzrə təkliflər paketi Azərbaycan hökumətinin müzakirəsindədir.
Müəlliflə əlaqə saxlamaq üçün elektron ünvan: с[email protected]
