Azərbaycan, Bakı, 15 yanvar/ Trend , müxbir S.Babayeva/ Azərbaycanda dövlət zəmanəti altında alınmış kredit, texniki yardım və qrantların istifadəsində şəffaflığın təmin edilməsi üçün mərkəzi monitorinq sistemi yaradılacaq.
Azərbaycan hökuməti "Azərbaycan hökumətinin dövlət zəmanəti altında aldığı qrant, texniki yardım, eləcə də kreditlərin hesabına maliyyələşdirilən layihələrin idarə edilməsinin avtomatlaşdırılması imkanlarının artırılması" layihəsi çərçivəsində məsləhətçinin müəyyən edilməsinə tender elan edib.
İslam İnkişaf Bankının qrant vəsaitləri hesabına maliyyələşdiriləcək layihənin məqsədi Azərbaycanda elektron hökumətin yaradılması ilə əlaqədar, dövlət zəmanəti altında alınmış kredit, texniki yardım və qrantların istifadəsində şəffaflığın təmin edilməsi üçün mərkəzi monitorinq sisteminin yaradılması və proqram təminatı, texnika, müasir informasiya texnologiyalarının tətbiqi vasitəsilə işin avtomatlaşdırılmasıdır.
Məsləhətçi şirkət layihələrin, borcun idarə edilməsi strukturunu təhlil etməli və beynəlxalq təcrübə əsasında onun təkmilləşdirilməsini təklif etməli, mərkəzi monitorinq sisteminin yaradılması üçün informasiya texnologiyalarının tətbiqi üzrə tələbləri öyrənməli, sistem istifadəçiləri üçün təlimat hazırlamalı və treninqlər keçirməlidir.
Maraqlanan şirkətlərin təklifləri yanvarın 30 - dək, Azərbaycanın Nazirlər Kabineti Aparatının Dövlət Zəmanəti Altında Kredit, Texniki Yardım və Qrantların Alınması üzrə İşlərin Koordinasiyası Şöbəsində qəbul ediləcək.
Müəlliflə əlaqə saxlamaq üçün elektron ünvan: [email protected]
