Azərbaycan, Bakı, 30 may / Trend , müx. S.Babayeva /
Azərbaycan provayderləri üçün qlobal şəbəkəyə çıxışın yeganə təchizatçısı Delta Telecom ölkənin internet resurslarının yerləşdirliməsi üçün məlumat mərkəzi yaradır, şənbə günü şirkətin rəhbəri Ramazan Vəliyev bildirib.
"Mərkəz az domenli milli resursları ödənişsiz yerləşdirmək üçün yaradılıb", - Vəliyev bildirib.
Onun sözlərinə görə, mərkəz 15 iyundan etibarən istifadəyə veriləcək və onun ümumi həcmi 10 qiqabit təşkil edəcək, bu isə 100 milyon internet saytın yerləşdirilməsinə imkan yaradacaq.
Hazırda mərkəzdə 500-dən artıq sayt yerləşdirilib.
Vəliyev bildirib ki, mərkəzin istifadəyə verilməsində əsas məqsəd öz resurslarının xaricdə yerləşdirilməsi üçün böyük vəsait sərf edən milli kontentin inkişafına yardım etməkdir.
"Biz Azərbaycanı internet kontentinin alıcısından, onun satıcısına çevirmək niyyətindəyik. Bunun üçün bizim mütəxəssislərimiz var. Sadəcə əlverlişli şərait lazımdır. Gələcəkdə biz digər ölkələrdən kontent cəlb etmək məqsədi güdürük", - Vəliyev bildirib.
Delta Telecom regionda ən böyük Backbone şəbəkəsinə malik, Azərbaycanın aparıcı rabitə operatorlarından biridir. Onun vasitəsi ilə Azərbaycanın bütün internet provayderləri və Gürcüstan provayderlərinin 78 faizi İP Backbone peşəkar xidmətləri ilə təmin olunurlar.
Məlumat mərkəzi (ingiliscə data center) server və rabitə avadanlıqlarının yerləşdirilməsi və internet şəbəkəsi kanalarına qoşulmaq üçün ixtisaslaşdırılmış sahədir. Tipik məlumat mərkəzi server avadanlığı və mərkəzin əsas funksiyalarını - məlumatın emalı və saxlanması - təmin edən informasiya strukturundan, məlumat mərkəzinin elementlərinin qarşılıqlı əlaqəsini və məlumat mərkəzi ilə istifadəçilər arasında məlumatın ötürülməsini təmin edən telekommunikasiya infrastrukturu, məlumat mərkəzinin əsas sistemlərinin normal fəaliyyətini təmin edən mühəndis infrastrukturundan ibarətdir.
