Azərbaycan, Bakı, 17 iyun / Trend , müxbir Ü.İsmayılova /
Azərbaycanın rabitə və informasiya texnologiyaları naziri Əli Abbasov Nyu Yorka rəsmi səfər edib. Bu barədə nazirlikdən bildirilib.
"Səfərin əsas məqsədi Avrasiya superinformasiya magistralının salınmasında BMT-nin dəstəyini almaqdır", - deyə Rabitə Nazirliyindən bildiriblər.
Layihənin məqsədi ucuz və keyfiyyətli internetdən, genişzolaqlı xidmətlərdən yaralanmaq, elektron informasiya şəbəkələrinin və elektron bazarının inkişafı üçün güclü informasiya texnologiyasının yaradılmasıdır.
Səfər çərçivəsində BMT-nin qərargahında Abbasovun genişmiqyaslı təqdimatlarının və brifinqlərinin keçirilməsi, həmçinin BMT-nin üzv dövlətlərinin səfriləri ilə görüşlərin keçirilməsi planlaşdırılır.
Azərbaycanın Rabitə Nazirliyi bu günlərdə ölkədə fəaliyət göstərən 20 ölkənin səfiri üçün layihənin geniş təqdimatını keçirib. Nazirlikdən bildirilib ki, layihənin həyata keçirilməsi iştirakçı ölkələr üçün təkcə informasiya texnologiyalarının deyil, eyni zamanda sosial sektor və iqtisadiyyatın digər istiqamətlərinin inkişafına şərait yaradacaq.
Ekspertlər hesab edir ki, layihənin həyata keçirilməsi üçün ilk növbədə vahid idarəetmə strukturu yaradılmalıdır, bütün maraqlı dövlətlər tariflərin nizamlanması istiqamətində şəbəkənin yaradılması üzrə vahid strategiyanın hazırlanmasında iştirak etməlidirlər.
Layihənin məbləği hələ ki, müəyyənləşdirilməyib. Layihənin təşəbbüskarı Azərbaycan Höküməti və ABŞ-ın Ticarət və İnkişaf Departamentidir.
Məqalə müəllifi ilə əlaqə ünvanı: [email protected]