Azərbaycan, Bakı, 22 oktyabr / Trend , müxbir H.Vəliyev/
Noyabrın 4-dən 7-dək BakuTel-2009 ilə eyni meydanda ikinci Beynəlxalq Xəzər CIPS-2009 "Mühafizə, Təhlükəsizlik və Xilasetmə vasitələri" sərgisi keçiriləcək. Bu barədə sərginin təşkilatçısı Iteca Caspian-ın məlumatında deyilir.
Təşkilatçının dediyinə görə, sərgilərin birlikdə keçirilməsi onunla əlaqədardır ki, əhalinin təhlükəsizliyinin təmin olunmasında informasiya texnologiyaları geniş tətbiq edilir və sərgilərin ekspozisiyası hər iki sahənin ekspertlərinin maraqlarını nümayiş etdirir.
Bu gün Azərbaycan, Türkiyə, Yaponiya, Rusiya, Ukrayna və Belarus şirkətləri sərginin işində öz iştiraklarını təsdiq ediblər.
CIPS-2009 sərgisi yerli xilasetmə vasitələrinin, yanğından mühafizə, kompüterlərin mühafizəsi sahəsində əldə olunan nailiyyətlərlə yanaşı, həmçinin həyat və istehsalata zərər vura biləcək müxtəlif təhlükələrə müqavimət göstərmək üçün ideyaların formalaşdırılması və informasiya mübadiləsi mərkəzi sahəsindəki nailiyyətlərini də nümayiş etdirəcək.
Ziyarətçilər xüsusi nəqliyyat vasitələrinin texniki xarakteristikası, sənaye casusluğuna müqavimət sistemləri, rabitə və xəbərdalıq, daxilolma siqnalizasiyaları ilə tanış ola biləcəklər. Bu il CCTV sistemləri, xüsusilə geniş təqdim olunacaq.
Məqalə müəllifi ilə əlaqə ünvanı: [email protected]