Azərbaycan, Bakı, 25 noyabr / Trend , müxbir H.Vəliyev/
Azərbaycan Rabitə və İnformasiya Texnologiyaları Nazirliyi insan potensialının və gələcək kadrların inkişafına kömək üçün tədris proqramının hazırlanması üzrə işlər aparır. Bu barədə Azərbaycan rabitə nazirinin müavini Elmir Vəlizadə "Allianz Group" konsaltinq şirkətinin təşəbbüsü ilə təşkil edilən "İnsan kapitalı. Dövlət. Biznes" mövzusunda keçirilən konfransda deyib.
Konfransın tərəfdaşları rolunda RİTN-in Beynəlxalq Əlaqələr və Hesablamalar Mərkəzi və AccessBank çıxış edir.
Nazir müavininin sözlərinə görə, RİTN-dən təqaüd alan daha çox fərqlənən tələbələrə idarə tərəfindən maliyyə dəstəyi göstərilir. Nazirlik onları təcrübələrlə də təmin edir, belə ki, həmin tələbələr nazirliyin müəssisələrində təcrübə keçirlər.
Tədris başa çatdıqda isə nazirlik tələbələrin RİTN müəssisələrində işlə təmin edilməsinə kömək edir.
"Bu gün İKT sahəsində fəaliyyət göstərən özəl şirkətlərlə sıx əməkdaşlıq zamanı insan potensialının inkişafı üzrə fond yaradılıb. İstedadlı tələbələrin təhsillərinin xaricdə davam etdirmələri baxımından bu fond mühüm əhəmiyyət kəsb edir", - Vəlizadə deyib.
Bundan əlavə, əgər işə daxil olan insan öz potensialını tam həyata keçirə bilmirsə, biz onun imkanlarını açmaq üçün yeni metodlar tətbiq etməyə hazırıq. Bunun üçün tədris mərkəzi mövcuddur. Bu tədris mərkəzi zamanın tələbinə uyğun olaraq, müasir texnologiyalar səviyyəsində kadrların yeni ixtisasa yiyələnməsinə kömək edir.
