Azərbaycan, Bakı, 14 dekabr / Trend , müxbir H.Vəliyev/
Azərbaycan yaxın zamanlarda informasiya-kommunikasiya texnologiyasının (İKT) inkişaf sürəti üzrə 10 ölkənin sırasına daxil ola bilər. Bu barədə Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri Rüfət Gülməmmədov jurnalistlərlə söhbətində bildirib.
Gülməmmədovun sözlərinə görə, bunun üçün ölkədə bütün lazımi şərait, hüquqi-normativ baza və perspektivli layihələr var.
Daha əvvəllər Beynəlxalq Proqram Təminatçıları Assosiasiyasının dəstəyi ilə Britaniyanın Economist Intelligence Unit araşdırma şirkətinin hesabatında məlumat verilirdi ki, İT sahəsində rəqabətə davamlılıq üzrə 2009-cu ilin məlumatına əsasən Azərbaycanın reytinqi yüksəlib. Bu gün Azərbaycan bu reytinqdə 61-ci yeri tutur. Bir il əvvəl isə 63-cü yerdə qərarlaşmışdı.
Davosda keçirilən "Qlobal İnformasiya texnologiyası" Ümumdünya iqtisadi forumunun (ÜİF) hesabatında 2008-2009-cu illərdə İKT üzrə Azərbaycan 134 ölkə arasında 60-cı yeri tutmuşdu. Azərbaycan ilk dəfə ÜİF-də 2005-2006-cı illərdə təmsil olunub və 73-cü yeri tutub. Ötən illər ərzində ölkə 13 pillə irəliləyərək MDB ölkələri arasında lider olub.
Ötən illər ərzində İKT sahəsində gəlirlərin artım sürəti orta dünya göstərcisini üç dəfə ötüb və hər il orta hesabla 32% təşkil edir. Bu göstərici İKT sahəsində inkişafı, spektrin genişlənməsini, informasiya və rabitə xidmətlərinin keyfiyyətinin artmasını əyani surətdə nümayiş etdirir.
Məqalə müəllifi ilə əlaqə ünvanı: [email protected]