Azərbaycan, Bakı, 29 yanvar / Trend , H.Vəliyev/
Azərbaycanın Dövlət Poçt Rabitə operatoru "Azərpoçt" MMC kütləvi ödəmələrin mərkəzləşdirilmiş sisteminin tətbiq edilməsinə dair işlər aparır. Bu barədə "Azərpoçt"un məlumatında deyilir.
Bu gün sistem paytaxtın poçt şöbələrində tətbiq edilir. Operatorun planına sistemin regional səviyyədə genişləndirilməsi daxildir. İlkin mərhələdə sistem Sumqayıt, Gəncə və Göyçay poçt rabitə şöbələrində tətbiq ediləcək. Yeni elektron sistem pul köçürmələrinin vaxtını maksimum dərəcədə azaltmağa imkan verəcək. "Azərpoçt"un məlumatına əsasən, ötən ilin yekunlarına görə pul köçürmələrinin miqdarı 757 395 vahid təşkil edib ki, bunun da 757 064 vahidi verilib.
Ötən dövr ərzində operator tərəfindən 5,7 milyon ədəd yazılı korrespondensiya qeydiyyata alınıb. Yazılı korrespondensiyaların ümumi sayından 668 min ədəddən çoxu beynəlxalq və 5 milyondan çox ədəd isə respublikadaxili olub. Ötən il operator tərəfindən 104 min ədəd daxili və 7 mindən çox beynəlxalq bağlama qəbul edilib.
Məqalə müəllifi ilə əlaqə ünvanı: [email protected]
