Azərbaycan, Bakı, 12 fevral / Trend , müxbir H.Vəliyev/
Naxçıvan Muxtar Respublikasında (NMR) may ayınadək üçüncü nəsil mobil rabitənin (3G) 21 min abunəçiyə xidmət etməyə imkan verən telekommunikasiya avadanlığı quraşdırılacaq. Bunu NMR-in rabitə və informasiya texnologiyaları naziri Rövşən Məmmədov deyib.
Məmmədovun sözlərinə görə, 3G Naxçıvan şəhərini, muxtar respublikanın kənd və qəsəbələrini əhatə edəcək. 3G avadanlıqlarının quraşdırılması muxtar respublikanın əhalisinə ənənəvi səs xidmətlərindən əlavə, məlumatların yüksək sürətlə ötürülməsi, mobil televiziya, videozənglər və digər rabitə xidmətləri göstərməyə imkan verəcək.
3G baza stansiyasının fəaliyyət bazası 1,5-2 kilometr təşkil edir. 3G stansiyası eyni vaxtda 200-dən artıq abunəçiyə xidmət göstərə bilər. Müvafiq avadanlıqların olması ilə nömrə tutumu artırıla bilər.
Hazırda 3G standartında xidmətin göstərilməsinə dair lisenziyanı Azerfon-Vodafone brendi altında bu sistemdəki xidmətlərin kommersiya istismarına başlayan Azerfon şirkəti alıb.
3G şəbəkəsinin işə salınmasına dair lisenziyaya digər namizədlər Azercell və Bakcell şirkətləridir. Onların müraciətlərini Rabitə və İnformasiya Texnologiyaları Nazirliyi gözdən keçirir.
3G mobil rabitəsi məlumatların yüksək sürətlə ötürülməsi ilə xarakterizə edilir. 3G şəbəkəsində məlumatların ötürülmə sürəti 3,5 Mbit/s-ə çatıb ki, bu da multimedianın operativ yüklənməsini, internetə yüksəksürətli girişi təmin edir. 3G şəbəkəsinin istifadəçiləri bu standartı dəstəkləyən mobil telefonların köməyi ilə böyük həcmdə videogörüntü və məlumatları ötürə və qəbul edə bilərlər.
Məqalə müəllifi ilə əlaqə ünvanı: [email protected]
