Azərbaycan, Bakı, 13 aprel /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin Aztelekom İstehsalat Birliyi Sumqayıt telekommunikasiya qovşağının (TKQ) yeni nəsil şəbəkəyə (NGN - Next Generation Network) köçürülməsi üzrə işləri başa çatdırır. Bu barədə Aztelekom İB-dən Trend-ə bildirilib.
Hazırda Aztelekom tərəfindən 642, 648, 645 və 649 saylı ATS-lərə NGN avadanlıqlarının quraşdırılması başa çatdırılır.
Yenidənqurma nəticəsində TKQ-nın nömrə tutumu 56 min nömrəyə kimi artacaq.
İB tərəfindən Gəncə şəhərindəki ATS-lərə də NGN avadanlıqlarının quraşdırılması üzrə işlər aparılır ki, bu da telekommunikasiya trafikinin müxtəlif növləri üçün lazımi xidmətləri təkmilləşdirməyə imkan verəcək.
NGN (Next Generation Network) texnologiyası öz şəbəkəsini kommutasiya paketi ilə təqdim edir ki, bu da mövcud rabitə kanallarından effektiv istifadəyə imkan verir. Çevik kommutasiya sistemi və verilənləri ötürmənin vahid şəklə salınmış texnologiyası avadanlığın geniş siyahı xidmətləri göstərməsinə və yeniləri əlavə etməsinə imkan verir. Bu, əhaliyə ənənəvi xidmət növləri ilə yanaşı, IP-telefoniya, genişzolaqlı internet, IP-TV və digər xidmətlərin göstərilməsinə imkan verəcək.