Azərbaycan, Bakı, 15 aprel /Trend, müxbir H.Vəliyev/
Azərbaycan Mərakeş Krallığı ilə informasiya-kommunikasiya texnologiyaları sahəsində əməkdaşlıq haqqında rəsmi sənəd imzalayacaq. Bu barədə Azərbayca Rabitə və İnformasiya Texnologiyaları Nazirliyinin məlumatında deyilir.
Nazirliyin məlumatına görə, bu məsələ Azərbaycanın rabitə və informasiya texnologiyaları naziri Əli Abbasovun Mərakeş Krallığının Azərbaycandakı fövqəladə və səlahiyyətli səfiri Həsən Hami ilə görüşü zamanı müzakirə olunub.
İlkin məlumatlara görə, sənədin imzalanması Mərakeş Krallığının rabitə və informasiya texnologiyaları nazirinin "Telekommunikasiya və informasiya texnologiyaları" BakuTel-2010 Azərbaycan Beynəlxalq Sərgi və Konfransında iştirak etmək üçün Bakıya səfəri zamanı baş tutacaq.
Noyabrın 3-6-da keçiriləcək sərgi çərçivəsində konfrans təşkil ediləcək. Həmin konfrans zamanı telekommunikasiya bazarının, mobil sektorun, yeni texnologiyaların tətbiqinin aktual məsələləri müzakirə olunacaq.
Konfrans müəssisələrin biznes proseslərinin optimallaşması üçün nəzərdə tutulmuş son qərarlarla tanışlığa imkan verir. Nümayəndə heyətlərini informasiya texnologiyaları və proqram təminatı sahəsində yeni nailiyyətlərlə tanış edəcək aparıcı beynəlxalq və yerli IT və telekommunikasiya şirkətlərinin mütəxəssisləri məruzə ilə çıxış edəcəklər.
BakuTel-2010 sərgisində telekommunikasiya və şəbəkə, genişzolaqlı rabitə və texnologiya, simsiz rabitə, peyk rabitəsi və texnologiyası, teleyayım avadanlığı və texnologiyası, proqram təminatı və avtomatlaşdırma sistemi, IT və ofis texnologiyası, təhlükəsizlik sistemi, bank texnologiyası və xidmətləri, elektron biznes və elektron hökumət təqdim olunacaq.
