Azərbaycanda proqram təminatlarından qeyri-leqal istifadənin səviyyəsi 2 faiz azalıb
Azərbaycan, Bakı, 13 may /Trend, müxbir Q.Vəliyev/
2009-cu il üzrə "International Data Corporation" (IDC) şirkətinin araşdırmaları əsasında hazırlanan "Business Software Alliance"ın (BSA) illik hesabatında Azərbaycanda pirat proqram təminatlarının yayılma səviyyəsi 88 faizədək azalıb. Bu barədə BSA-nın hesabatında deyilir.
2009-cu il ərzində kompüter piratçılığının səviyyəsinin araşdırılması proqram təminatlarının bütün kateqoriyalarını (əməliyyat sistemləri, sistemli PT, məlumat bazaları və təhlükəsizlik paketləri, tətbiqi PT) əhatə edir.
Son illər ərzində Azərbaycanda pirat proqram təminatlarından istifadə üzrə vəziyyətin davamlı olaraq yaxşılaşması müşahidə edilir. Əgər 2006-cı ildə piratçılığın səviyyəsi 94, 2007-ci ildə 92, 2008-ci ildə 90 faiz təşkil edirdisə, məlumatlara görə, 2009-cu ildə bu rəqəm 88 faiz olub.
Təhlil göstərir ki, son dörd il ərzində Azərbaycanda piratçılığın səviyyəsində illik, orta hesabla, iki faiz azalma müşahidə olunur.
Azərbaycanda proqram təminatlarından qeyri-leqal istifadənin kommersiya qiyməti 52 milyon dollar təşkil edir ki, bu da 2008-ci ildəki göstəricidən 3 milyon dollar azdır.
Qeyri-leqal məhsulların istifadəsindən bütün dünya üzrə dəyən ziyanını məbləği 51,4 milyard həcmində qiymətləndirilir.
Tədqiqat aparılan 111 ölkədə saxta məhsul bazarının yüksək səviyyəyə malik olduğu ölkələr arasında birinci yeri Gürcüstan (95 faiz), ikinci yeri Zimbabve (92 faiz),üçüncü yeri Banqladeş (91 faiz) tutur. MDB dövlətləri arasında piratçılığın səviyyəsinə görə birinci yerləri Moldova (91 faiz), Ermənistan (90 faiz), Belarus (87 faiz) tutur.
BSA hesabatına görə, kompüter piratçılığının səviyyəsinin azalması 54 ölkədə, artımı isə 19 bazarda müşahidə olunub. Ümumilikdə, dünyada kompüter piratçılığının səviyyəsi keçid iqtisadiyyatına malik ölkələrdə proqram təminatlarının quraşdırılmasının əhəmiyyətli artımı hesabına 41-dən 43 faizədək yüksəlib.
IDC-pin məlumatına görə, 2009-cu ildə leqal proqram təminatı satışındakı hər 100 dollardan 75 dolları pirat proqram təminatının payına düşür.
ABŞ, Yaponiya və Lüksemburq, əvvəlki kimi, dünyada piratçılığın ən aşağı səviyyəsini (müvafiq olaraq 20, 21 və 21 faiz) qoruyub-saxlayır.