Azərbaycan, Bakı, 21 iyun /Trend, müxbir H.Vəliyev/
Azərbaycanın poçt rabitəsi operatoru "Azərpoçt" MMC Bərdə filialının avtomatlaşdırılmış korporativ-informasiya sisteminə qoşulması ilə bağlı işlər aparır. Bu barədə bazar ertəsi Trend-ə Azərbaycanın Rabitə və İnformasiya Texnologiyaları Nazirliyindən bildiriblər.
Nazirliyin məlumatına görə, hazırda operator tərəfindən filialın texniki təchizatı ilə bağlı işlər görülür. Bunda məqsəd əhaliyə gələcəkdə maliyyə xidmətlərinin göstərilməsidir.
Əvvəlcə Trend-ə nazirliyin poçt rabitəsi şöbəsinin rəhbəri Novruz Məmmədovun dediyinə görə, Azərpoçt əhaliyə maliyyə xidməti göstərməkdə bütün hüquqlara malikdir.
Gələcəkdə Mərkəzi Bank Azərpoçtun texniki hazırlıq səviyyəsinə uyğun maliyyə xidmətlərinin göstərilməsinə icazə verəcək.
Məmmədovun sözlərinə görə, çox qısa müddət ərzində texniki təchizat başa çatandan sonra avtomatlaşdırılmış korporativ-informasiya sisteminə poçt rabitəsinin bütün şöbələrini qoşmaq mümkün olacaq.
Bank xidmətlərinin göstərilməsi hazırda istismara hazır olan avtomatlaşdırılmış korporativ-informasiya sistemi sayəsində mümkün olacaq.
İlkin mərhələdə poçt şöbələri məhdud bank əməliyyatları həyata keçirəcəklər. Bura kassa əməliyyatlarının keçirilməsi, pul köçürmələri və müştəri hesablarının açılması daxildir. Gələcəkdə əhaliyə kreditlərin verilməsi də nəzərdə tutulur.
Azərbaycanın bank bazarına Azərpoçtun daxil olması bank bazarının iştirakçıları arasında ciddi rəqabətə gətirib çıxaracaq. Hazırda Azərbaycanın bank bazarında 47 bank fəaliyyət göstərir. Filialların ümumi sayı 500 ədəddir. Azərpoçtun poçt şöbələrinin sayı 1600 ədəd təşkil edir.