Azərbaycan Rabitə Nazirliyi Belarus ilə əməkdaşlıq üzrə işçi qrupu yaradacaq

Azərbaycan, Bakı, 28 iyul /Trend, müxbir H.Vəliyev/

Yaxın vaxtlarda Azərbaycan Rabitə və İnformasiya Texnologiyaları Nazirliyi yanında Belarus ilə informasiya-kommunikasiya texnologiyaları sahəsində əməkdaşlıq üzrə işçi qrupu yaradılacaq. Bu barədə çərşənbə günü nazirliyin Elmi potensial və strateji planlaşdırma şöbəsinin müdiri İsfəndiyar Əliyev bildirib.

Onun sözlərinə görə, işçi qrupunun planlarına "elektron hakimiyyət", informasiya cəmiyyətinin inkişafı, İKT sahəsində birgə müəssisələrin yaradılması, kadrların və texniki parkların hazırlanması sahələri üzrə ikitərəfli münasibətlərin formalaşdırılmasını nəzərdə tutan amillər daxildir.

İki ölkə arasında İKT sahəsində əməkdaşlıq yüksək texnologiyalar sahəsində qarşlıqlı faydalı münasibətlərin möhkəmlənməsinə və gələcək inkişafına istiqamətlənən fevralda imzalanmış sənədə uyğun həyata keçirilir.

Belarus Prezidentinin Azərbaycana səfəri zamanı elm və informasiya texnologiyaları sahəsində əməkdaşlığı da nəzərdə tutan bir neçə hökumətlərarası saziş imzalanmışdı.