Azərbaycan, Bakı, 2 avqust /Trend, müxbir Q.Vəliyev/
Rəqəmsal yayım üzrə Koordinasiya Qrupu (RYKQ) rəqəmsal tezliklərə yiyələnmə ilə bağlı koordinasiya məsələlərini nəzərdən keçirəcək. Bu barədə Regional Rabitə Birliyinin (RRB) məlumatında deyilir.
Məsələ Koordinasiya Qrupunun rəqəmsal yayım üzrə avqustun 27-də Qırğızıstanda keçiriləcək 12-ci iclası çərçivəsində müzakirə ediləcək.
İclas çərçivəsində RYKQ tezliklərə yiyələnmə koordinasiyası və planlı modifikasiyalaşdırılma, RRB rabitə administrasiyaları arasında 174-230 mhz tezliklər zolağında rəqəmsal yayımın ayırılması üzrə yeni tövsiyələr layihəsinin işlənməsi işini davam etdirəcək.
Azərbaycanı iclasın işində Rabitə və İnformasiya Texnologiyaları Nazirliyi təmsil edəcək.
Bundan əvvəl Radiotezliklər Dövlət İdarəsinin baş mühəndisi İlham Əfəndiyevin Trend-ə dediyinə görə, Azərbaycanda 174 - 230 mhz üçmetrlik diapazonu rəqəmsal yayım üçün tətbiq edilir və 6-12 kanalı əhatə edir.
Koordinasiya Qrupunun iclasında yerüstü rəqəmsal televiziya yayımının təcrübə və planlarının tətbiq edilməsi və rəqəmsal yayımın təcrübi zonalarında keçirilmiş sınaqların nəticələrinə baxılması da planlaşdırılıb.
Hazırda dünyanın üç regionunda müxtəlif teleradiotezliklər fəaliyyət göstərir, radiorabitə və yayımın müxtəlif texnologiyaları tətbiq edilir. Azərbaycan Avropa regionuna aiddir və bu, Azərbaycana Avropa radiotexnologiyalarını seçməyi diktə edir. Belə ki, başqa seçim sərhədyanı rayonlarda radiotezlik spektrinin qeyri-effektiv istifadəsinə səbəb ola bilər.
İclasdan sonra "ITU"nun avqustun 24-25-də Qırğızıstanda baş tutacaq "Rəqəmsal yayımın həyata keçirilməsi" seminarı keçiriləcək.