Azərbaycan, Bakı, 16 avqust /Trend, müxbir Q.Vəliyev/
Azərbaycanın "Sistema" sistem inteqrator şirkəti genişzolaqlı daxilolma üzrə xidmətlərin təqdim edilməsi üçün volokon-optik şəbəkənin yaradılması ilə bağlı pilot layihənin həyata keçirilməsinə başlayıb. Bu barədə Trend-ə bazar ertəsi şirkətin direktoru Aden İlizarov deyib.
İlizarovun sözlərinə görə, avadanlığın təchizatçısı qismində Rusiyanın telekommunikasiya avadanlıq istehsalçısı "QTECH" şirkəti çıxış edir. Onunla tərəfdaşlıq sazişi imzalanıb.
"Sistema" şirkətinin alacağı avadanlıq Azərbaycanda əhaliyə İnternetə daxilolma üzrə genişzolaqlı xidmətlərin təqdim edilməsi üçün "Ethernet" şəbəkəsinin yaradılması məqsədilə istifadə olunacaq. Beynəlxalq rabitə kanallarının tədarükçüsü qismində "Delta Telecom" şirkəti çıxış edəcək", - İlizarov bildirib.
İlizarovun sözlərinə görə, "QTECH" şirkəti ilə əməkdaşlığın ikinci istiqaməti Azərbaycana "DSL" modemlərinin tədarükündən ibarətdir. İnternet servis provayderləri onları sınaqdan sonra əldə edə biləcəklər.
