Azərbaycan, Bakı, 26 avqust /Trend, müxbir H.Vəliyev/
Azərbaycanın İT şirkəti SINAM Qırğızıstan Respublikası Dövlət Vergi Xidmətinin (DVX) avtomatlaşdırılması layihəsini həyata keçirməyə başlayıb. Bu barədə cümə axşamı SINAM şirkətinin biznesin inkişafı üzrə direktoru İslam Əhmədov deyib.
Onun sözlərinə görə, hazırda SINAM tərəfdən tapşırıqların qoyuluşu, tələblərin formalaşdırılması həyata keçirilir, Qırğızıstanın vergi sisteminin biznes-prosesləri öyrənilir ki, bunun da əsasında DATA model və alqoritmlər yaradılacaq.
"Bu strukturun əməkdaşlarının işi daha çox Microsoft sistemi ilə bağlı olduğundan üstünlük məhz bu istehsalçının platformasına verilib. İşlərin iki il ərzində başa çatdırılması planlaşdırılıb. Layihənin dəyəri üç milyon dollardan çoxdur", - Əhmədov vurğulayıb.
Azərbaycanın SINAM şirkəti Qırğızıstan Respublikası Dövlət Vergi Xidmətində (DVX) inteqrasiya olunmuş vergi inzibatçılığı sisteminin proqram təminatının işlənib hazırlanması və tətbiqi üzrə elan olunmuş beynəlxalq tenderin qalibi olub. Proqram təminatının tətbiqi Asiya İnkişaf Bankı tərəfindən maliyyələşdirilən "Vergi inzibatçılığında islahat və modernləşdirmə" layihəsi çərçivəsində həyata keçiriləcək. Bu barədə şirkətin məlumatında deyilir.
Tenderdə iştirak etmək üçün proqram təminatını hazırlayacaq şirkətin qarşısında bir neçə təsnifat tələbi var idi: Asiya İnkişaf Bankının üzvü olan ölkəyə mənsubiyyət, 2007-2009-cu illərdə minimal illik dövriyyənin 3 milyon ABŞ dollar olması, proqram təminatının işlənib hazırlanması üçün ISO9001 sertifikatına malik olmaq. Bundan əlavə, 2005-2009-cu illərdə hər birinin dəyəri 2 milyon ABŞ dolları və ya daha çox olan proqram təminatının hazırlanması və tətbiqi sahəsində iki oxşar layihənin yerinə yetirilməsi təcrübəsinin olması da zəruri şərt idi.
Tenderin şərtlərinə əsasən, proqram təminatı Qırğızıstan Dövlət Vergi Xidmətinin mərkəzi aparatında və ölkənin bütün rayon vergi müfəttişliklərində quraşdırılacaq. Tətbiq edilən informasiya sistemi 11 komponentdən ibarət olacaq ki, onların da hər biri bir istiqamət üzrə yüksək funksionallığı təmin edəcək.
Vergi inzibatçılığı üçün işlənib hazırlanmaqda olan proqram təminatının tərkibinə vergi ödəyicilərinin qeydiyyatı, gəlirlərin uçotu, bəyannamələrin işlənməsi, audit, borcların məcburi tutulması, apelyasiya, üçüncü tərəfin məlumatları modulları və güclü korporativ sayt daxil olacaq. Proqram təminatı Dövlət Vergi Xidmətinin mərkəzi aparatını, iri vergi ödəyiciləri ilə iş üzrə idarəni və 55 rayon müfəttişliyini vahid informasiya sistemi çərçivəsində birləşdirməyə imkan verəcək və avtomatlaşdırılmış hesabatların hazırlanması üçün imkan yaradacaq. Bundan əlavə, hökumətin digər maliyyə qurumları ilə məlumat mübadiləsi və verilənlər bazalarının sinxronlaşdırılması da təmin olunacaq. Vergi ödəyiciləri ilə işi daha da yaxşılaşdırmaq məqsədilə Call-mərkəz (call-centre) sistemi tətbiq olunacaq.
Proqram həllərinin tətbiqi Qırğızıstanın vergi orqanlarına vergi yığımı prosesini daha səmərəli şəkildə idarə etməyə imkan verəcək və dövlət büdcəsinə vergi yığımının səviyyəsini artıracaq.
