Azərbaycan, Bakı, 11 noyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi Gəncə telekommunikasiya qovşağının (TKQ) 54 saylı ATS-nin nömrə tutumunun elektron formaya keçirilməsinə başlayıb. Bu barədə Trend-ə cümə axşamı Gəncə TKQ rəisinin köməkçisi Elşad Əliyev bildirib.
Əliyevin sözlərinə görə, nömrə tutumlarının köçürülməsi üzrə işlər noyabrın 8-dən etibarən sutka ərzində aparılır və indiyədək bu ATS-in orta hesabla 3,5 min nömrəsi elektron şəklə salınıb.
Operator dekabrda 55 saylı ATS-in də nömrə tutumlarını elektron şəklə keçirməyi planlaşdırır. Bu ATS-in nömrə tutumu 10 min ədəd təşkil edəcək.
2011-ci ilin ilk aylarında Gəncənin stasionar rabitə şəbəkəsinin nömrə tutumu yeddirəqəmli nömrələmə sisteminə keçiriləcək. Yeddirəqəmli nömrələmə sisteminə keçməklə, Gəncə şəhərinin telefon nömrələri "5" indeksi ilə başlayacaq (554-xx-xx, 555-xx-xx və s.). Yeni nömrələmə sistemi operatora ATS-in nömrə tutumunun resursunu artırmağa imkan verəcək və bu da öz növbəsində boş nömrələrin çatışmazlıq problemini həll edəcək.
Gəncə Bakı, Sumqayıt və Naxçıvandan sonra infrastrukturun inkişafının yeddirəqəmli nömrələmə sistemini tələb etdiyi dördüncü şəhər olacaq.