Azərbaycan, Bakı, 6 dekabr /Trend, müxbir H.Vəliyev/
İlin sonunadək AzDataCom-un internet infrastrukturu inkişafın fəal mərhələsinə daxil olacaq. Bu barədə bazar ertəsi Azərbaycanın rabitə və informasiya texnologiyaları nazirinin müavini İltimas Məmmədov deyib.
Məmmədovun sözlərinə görə, bu gün AzDataCom-un şəbəkə infrastrukturu ilə hələ ki Şəki, Zaqatala və Baləkən rayonları əhatə edilməyib.
"Bu istiqamətdə işlər aparılır və plana əsasən, bu işlər ilin sonuna başa çatmalıdır. AzDataCom-un şəbəkə infrastrukturunun genişləndirilməsi üzrə işlərin ikinci mərhələsi Lerik-Yardımlı istiqamətində optik-lif kabel magistralının çəkilməsini nəzərdə tutur", - nazir müavini qeyd edib.
AzDataCom seqmentinin genişləndirilməsi üzrə işlər "Milli e-İdarəçilik Şəbəkəsi Təşəbbüsü" layihəsi çərçivəsində həyata keçirilir.
Şəbəkənin buraxılış qabiliyyəti 10 Gbit/saat təşkil edir. Yüksəksürətli şəbəkənin istismara verilməsi genişzolaqlı internet istifadəçilərinin və qeyri-ənənəvi rabitə xidmətlərinin (VoIP, IP-TV və s.) sayını xeyli artırmağa imkan verəcək.
Layihənin həyata keçirilməsi uzaqdan idarəetmə təhsilində, elektron ticarətdə və biznesin uzaqdan idarə edilməsində şəbəkənin imkanlarından uğurla istifadə etməyə imkan verəcək.
