Azərbaycan, Bakı, 9 dekabr /Trend, müxbir H.Vəliyev/
Regional Rabitə Birliyi (RRB) ölkələrinin sinxron səsli yayım şəbəkələrinin radiotezlik resurslarından orta və uzun dalğalarda (OD/UD) istifadənin öyrənilməsi üzrə işçi qrupu OD/UD diapazonlarının tezliklərindən istifadə variantlarını nəzərdən keçirəcək. Bu barədə cümə axşamı Dövlət Radiotezliklər İdarəsinin (DRİ) baş mühəndisi İlham Əfəndiyev deyib.
Məsələ işçi qrupunun dekabrın 14-17-də Minskdə keçiriləcək növbəti iclası zamanı müzakirə ediləcək. İclasda Azərbaycanı Rabitə və İnformaisya Texnologiyaları Nazirliyinin Dövlət Radiotezliklər İdarəsi təmsil edəcək.
Əfəndiyevin sözlərinə görə, söhbət bir dövlətin istifadə etdiyi ötürücülərin digər ölkənin yayım diaqramına maneçilik törətməməsi üçün 549 kQs, 873 kQs və 171 kQs tezliklərinin əlaqələndirilməsindən gedir.
İclasda maneələrin aradan qaldırılması, texniki təkliflərin həyata keçirilməsi və onların razılaşdırılması imkanları üçün yanaşma və kriteriyaların müəyyənləşdirilməsi gözlənilir.
"Koordinasiyanın nisbətən əlverişli kriteriyası, əvvəllər hesab edildiyi kimi, ötürcü qurğuların güc səviyyəsinin xeyli azaldılması olmalı idi. Bununla RRB-nin əksər rabitə administrasiyaları ötürücülərin gücünün xeyli azaldılmasının bu ölkələrin ərazisində yayımın tələbatını ödəməyə imkan verməyəcəyi ilə bağlı razılaşmadılar. Buna görə də bu gün antenlərin konfiqurasiyasının və istiqamətinin dəyişdirilməsi yolu ilə ötürücülərin informasiya mübadiləsinin səviyyəsi ilə bağlı variant nəzərdən keçirilir. Bu variantın əlverişli və daha asan olmasına baxmayaraq, o, diqqətli yanaşma və qiymətləndirmə tələb edir. Bununla əlaqədar bu gün yeni kriteriyaların müəyyənləşdirilməsi aparılır", - Əfəndiyev qeyd edib.
Bundan əvvəl DRİ-nin baş mühəndisinin dediyi kimi, hələlik istifadə edilməyən, lakin Azərbaycan DRİ-də qeydiyyatdan keçən 549 MHz tezlik diapazonu üçün ötürücülərin gücünün səviyyəsi cəmi 60 kilovat təşkil edir. Bu göstəricini 50 kilovata qədər azaltmaq da olar. Gücün daha çox azaldılması məqsədəuyğun deyil.
Əfəndiyevin sözlərinə görə, koordinasiya üzrə ilk təkliflər 2011-ci ilin aprelində Qazaxıstanda keçiriləcək RRB-nin Peyk rabitəsi, televiziya və səsli radioyayım üzrə komissiyasının iclasında təsdiqlənməlidir.
