Azərbaycan, Bakı, 15 dekabr /Trend, müxbir H.Vəliyev/
Açıq mənbələrdən ümumi istifadə ilə informasiya sisteminə daxil edilən fərdi informasiya Azərbaycan Rabitə və İnformasiya Texnologiyaları Nazirliyinin yazılı tələbi ilə ləğv edilə bilər. Bu barədə Trend-ə çərşənbə günü nazirlikdən bildiriblər.
Müvafiq qərar Azərbaycan Prezidenti İlham Əliyevin "Fərdi informasiya haqqında" qanunun tətbiqi ilə bağı fərmanına əsasən qəbul edilib. Fərmanda nazirliyə fərdi informasiyanın informasiya resurslarının formalaşdırılması üzrə xidmətlərin lisenziyalaşdırılması, eləcə də onlara əsaslanan informasiya sistemlərinin yaradılması və xidmətlərin göstərilməsi funksiyaları tapşırılıb.
Lisenziya üçün dövlət rüsumunun qiyməti 2,2 min manatdır.
Fərdi informasiyanın informasiya sistemlərinin dövlət qeydiyyatının aparılması qaydalarına əsasən, nazirlik metodik, informasiya-linqvistik və texniki-proqram dəstəyi, reyestrdən çıxarışın verilməsi, arxivləşdirmə və reyestrə daxil edilən informasiyanın saxlanılması, eləcə də dövlət reyestrinin sabit fəaliyyətini təmin etmək üçün üzərinə öhdəlik götürür.
Hüquqi və fiziki şəxslər reyestr operatorunun internet resursunda yerləşdirilən informasiya sistemləri haqqında məlumatı əldə etmək hüququna malikdirlər. İnternet-resursda yerləşdirilən informasiyanın məzmunu operator tərəfindən müəyyənləşdirilir.
