Azərbaycan, Bakı, 28 fevral /Trend, müxbir H.Vəliyev/
Beynəlxalq Telekommunikasiya İttifaqının (ITU - International Telecommunication Union) Tədqiqat komissiyasına peyk rabitəsi və tezlik resursları sistemlərinin əlaqələndirilməsinin sadələşdirilməsi üzrə məsələləri öyrənmək tapşırılıb. Bu barədə bazar ertəsi Trend-ə Rabitə və İnformasiya Texnologiyaları Naizrliyinin Telekommunikasiya şöbəsinin baş müşaviri Qulam Abdullayev məlumat verib.
Məsələyə 2012-ci il fevralın 14-dən 25-dək Cenevrədə keçiriləcək Ümumdünya Radiorabitə konfransının ilkin iclası çərçivəsində baxılacaq. İclas zamanı ITU və Regional Rabitə Birliyinə (RRB) üzv ölkələrin ilkin təkliflərinə baxılacaq. İştirakçılar tezlik resurslarından bərabər istifadə və onların əlaqələndirilməsi, peyk, naviqasiya, televiziya və s. məsələri müzakirə edəcəklər.
Abdullayevin sözlərinə görə, orbital mövqelərin əlaqələndirilməsi məsələləri üzrə ITU-ya müraciət edən Azərbaycan bununla əlaqədar prosedur qaydaların sadələşdirilməsində və qısa müddət ərzində həll edilməsində maraqlıdır.
"Radiotezlik kanallarının qeydiyyatı və paylanmasına dair məsələlər də mövcuddur. Söhbət yeni, daha doğrusu, mobil və genişzolaqlı rabitənin ehtiyacları üçün istifadə edilə bilən 790 və 862 MHz tezlik resurslarının paylanmasından gedir. Bütün bu məsələlər, peyk sistemlərinin tezlik mənimsəmələrinin koordinasiyasının prosedurları ilə bağlı məsələlər 2012-ci il Ümumdünya Radiorabitə konfransında öz həllimi tapa bilərlər", - Abdullayev deyib.
Məlum olduğu kimi, Azərbaycan peyk mövqelərinin əlaqələndirilməsi məsələləri üzrə müraciət edib və bu gün bununla əlaqədar iş aparılır. Azərbaycan artıq 35 ölkədən yeddisi ilə peyk sistemləri tezliklərinin əlaqələndirilməsi məsələlərini razılaşdırıb.
Abdullayevin dediyi kimi, bu məsələ ilə bağlı son danışıqlar Cenevrədə keçirilən iclas çərçivəsində Lüksemburqda aparılıb.
Azərbaycan son beş il ərzində digər ölkələrin peyk sistemləri ilə "Azerspace" milli peykinin peyk mövqelərinin əlaqələndirilməsi məsələlərini tam həll etməlidir.
ITU üzvü olan ölkələrin razılığı ilə orbital-tezlik resursunun ayrılmasının iki prinsipi qəbul edilib: paylayıcı və əlaqələndirici. Paylayıcı sistem konkret xidmətlər üzrə resursların müəyyən məhdud həcmini paylayır. ITU-nun paylayıcı həllinə yayım xidmətinin ümumdünya planı nümunə ola bilər. Bütün dövlətlər həmin plan üzrə uzun müddətə bilavasitə televiziya yayımları üçün milli şəbəkə sistemində yerləşdirmək məqsədilə geostasionar orbitdə orbital-tezlik resursu alırlar. Lakin peyk rabitəsi sistemlərinin əksəriyyəti əlaqələndirmə əsasında resurs alırlar. Peyk sistemlərinin yaradılmasını planlaşdıran ölkə əvvəlcədən (ITU vasitəsilə) sistemin əsas xarakteristikasını dərc etdirir, maraqlarına toxunulan qonşu peyk rabitəsi sistemlərinin sahibləri ilə onun razılaşdırılmasını həyata keçirir.
