Azərbaycan, Bakı, 18 mart /Trend, müxbir H.Vəliyev/
Azərbaycan Dövlət Statistika Komitəsi (DSK) istifadəçilərə statistik məlumatları operativ şəkildə əldə etməyə imkan verən elektron sənəd dövriyyəsi sistemini tətbiq edib. Bu barədə DSK-nın cümə günü yaydığı məlumatda deyilir.
Hələlik xidmətdən dövlət idarəetmə orqanları istifadə edə bilərlər.
Aylıq statistik məlumatları əldə etmək üçün DSK-nın elektron sənəd dövriyyəsi sisteminə qoşulmaq vacibdir. İstifadəçilər səviyyəsində məlumat bazasına giriş autentifikasiyadan sonra (İstifadəçi parolu DSK-ya müraciətdən sonra verilir) təqdim olunur.
Elektron sənəd dövriyyəsi sisteminə uzaqdan giriş üçün Windows Installer əlavəsini (Microsoftun çoxlu əlavələrini quraşdırmağa və kökləməyə imkan verən xidmət), Windows.NET Framework v3.5 (Service Pack 1), eləcə də DSK elektron sənəd dövriyyəsi sisteminin müştəri modulunu yükləmək lazımdır. Bütün zəruri proqram təminatlarına DSK-nın VEB-səhifəsində giriş mümkündür.
