Azərbaycan, Bakı, 18 aprel /Trend, müxbir H.Vəliyev/
Bu ilin birinci rübündə 2010-ci ilin müvafiq dövrü ilə müqayisədə İKT və poçt rabitəsi sektoru üzrə gəlirlərin həcmi 24,3 faiz artıb və 299 milyon manat təşkil edib. Bu barədə Rabitə və İnformasiya Texnologiyaları Nazirliyinin 2011-ci ilin birinci rübünün yekunları üzrə hesabatında bildirilir.
2010-ci ildə Azərbaycanın ÜDM-də İKT və poçt rabitəsi sektoru üzrə gəlirlərin həcmi 1,9 faiz təşkil edib.
Nazirliyin məlumatına görə, birinci rübdə ÜDM-də qeyri-neft sektorunun həcmi 4951,0 milyon manat, real artım həcmi isə 5,6 faiz səviyyəsində olub. İlin üç ayının yekunları üzrə ÜDM-də qeyri-neft sektoru üzrə gəlirlərin həcmi 3,9 faiz təşkil edib.
Ötənilki göstəricilərlə müqayisədə respublikada birinci rübdə İKT sektoru üzrə artım templəri 24,7 faiz, telekommunikasiya sektoru üzrə - 19,2 faiz, İT-sektoru üzrə 2,3 dəfə təşkil edib.
ÜDM-da İKT və poçt rabitəsi sektoru üzrə əldə olunan gəlirlərin 80 faizi qeyri-dövlət müəssisələrinin payına düşüb. Sektor üzrə əldə olunan gəlirlərin ümumi həcmindən 70,3 faiz mobil rabitə bazarının payına düşüb ki, onun artım templəri ötən ilin müvafiq dövrünün göstəriciləri ilə müqayisədə 14,4 faiz təşkil edib.