Azərbaycan, Bakı, 21 aprel /Trend, müxbir H.Vəliyev/
Stasionar telefon nömrələrinin yeddirəqəmli nömrələnməsi sistemi bütün Azərbaycan ərazisində tətbiq ediləcək. Bu barədə cümə axşamı Trend-ə Gəncə Telekommunikasiya Qovşağından məlumat verilib.
"Aztelekom" İB-nin bütün telekommunikasiya qovşaqlarının yeddirəqəmli nömrələnməsi sisteminə keçməsi barədə qərar Rabitə və İnformasiya Texnologiyaları Nazirliyi səviyyəsində qəbul olunub və nazirlik operatora bütün telefon şəbəkələrinin altırəqəmli nömrələnmə sistemindən yeddirəqəmliyə keçidə hazırlaşmağı tapşırıb.
Bununla əlaqədar yeddirəqəmli sistemin tətbiqi məsələsinə respublika miqyasında baxılır ki, bu da bütün regional telekommunikasiya qovşaqlarının hazırlanmasından sonra baş verə bilər.
Gəncə Telekommunikasiya Qovşağının telefon şəbəkəsi yeddirəqəmli nömrələnmə sisteminə keçməyə hazırdır. Ümumi telefon şəbəkəsinin tam elektronlaşdırılması üzrə işlər başa çatıb.
Bu gün Sevinc və Qırmızı kənd qəsəbələrində 53/59 mini-ATS-lərin qoşulması işləri aparılır. Yeddirəqəmli nömrələnmə sisteminə keçidlə əlaqədar Gəncədə telefon nömrələri "5" indeksi ilə (554 - xx - xx , 555 - xx - xx və s.) başlayacaq. Yeni nömrələnmə sistemi operatora ATS-in nömrə tutumu resursunu artırmağa imkan verəcək ki, bu da sərbəst nömrə qıtlığı problemini həll edəcək.