Azərbaycan, Bakı, 10 oktyabr /Trend, müxbir, H.Vəliyev/
Azərbaycanın poçt rabitəsi operatoru "Azərpoçt" MMC əhaliyə maliyyə xidmətləri göstərmək məqsədilə Göyçay filialını avtomatlaşdırılmış korporativ informasiya sisteminə qoşub. Bu barədə bazar ertəsi Trend-ə Azərbaycanın Rabitə və İnformasiya Texnologiyaları Nazirliyinin mətbuat xidmətinin rəisi Müşfiq Əmirov məlumat verib.
Əmirovun sözlərinə görə, Göyçay filialı poçt operatorunun regional filialları arasında maliyyə xidmətləri göstərməyə başlayan ilk filial olub.
"Azərpoçt" MMC 2010-cu ilin ortalarından əhaliyə maliyyə xidmətləri göstərməyə başlayıb. Operatora yeddi maliyyə xidmətindən beşini göstərməyə icazə verilib. Onlara hesabların açılması və idarə olunması, pul köçürmələrini həyata keçirilməsi, debit kartların emissiyası, müştərilərin sifarişi ilə valyutaların alqı-satqı əməliyyatları, nağd və digər qiymətli vəsaitlərin inkassasiyası daxildir.
Perspektivdə daha iki əlavə xidmətin - depozitlərin qəbulu və kredit kartlarını emissiyası - göstərilməsi məsələsinə baxılacaq.
Hazırda "Azərpoçt" MMC-nin 890 şöbəsi əhaliyə maliyyə xidmətləri göstərmək üçün Mərkəzi Bankın lisenziyasını alıb.
İlin sonuna qədər poçt operatorunun avtomatlaşdırılmış korporativ-informasiya sisteminə 1000 filial və şöbə qoşulacaq.
"Azərpoçt" maliyyə bazarının iştirakçısı olmaqla, bank bazarının oyunçuları ilə ciddi rəqabət aparacaq. Hazırda Azərbaycanın bank bazarında 44 bank fəaliyyət göstərir. Onların filiallarının ümumi sayı 700 ədədə çatır, halbuki "Azərpoçt"un poçt şöbələrinin sayı 1600 ədəddir.
...