Azərbaycan, Bakı, 19 yanvar /Trend, müxbir H.Vəliyev /
Azərbaycanın Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyi "Eirovision-2012" mahnı müsabiqəsinin keçirilməsi çərçivəsində alternativ rabitənin təmin olunması üzrə işlərə başlayıb. Bu barədə cümə axşamı Trend-ə İB-dən məlumat verilib.
Məlumata görə, işlər optik-lif xəttin çəkilməsini və birləşdirilmiş xidmətlərlə rəqəmli şəbəkənin (ISDN - Integrated Services Digital Network) avadanlığının quraşdırılmasını nəzərdə tutur. Optik infrastruktur Azərbaycan İctimai Televiziyasının binasınadək çatdırılacaq.
İşlər Rabitə və İnformasiya Texnologiyaları Nazirliyinin hazırladığı və nazirliyin bütün struktur bölmələrinə müəyyən vəzifələr həvalə edən plan üzrə aparılır.
"Bakı Telefon Rabitəsi" İstehsalat Birliyi tərəfindən müxtəlif dillərdə sorğu məlumatı təqdim edən pulsuz məlumat xidməti də təşkil olunacaq.
Bununla yanaşı, ictimai yerlərdə multimediyalı taksofon quraşdırılacaq. Bu qurğuların üstünlüklərindən biri təqdim olunan səs rabitəsi ilə yanaşı, məlumat xidmətlərinin göstərilməsi imkanıdır. Məsələn, orada Azərbaycan haqqında məlumat yerləşdirmək planlaşdırılır.
Terminallar Bakının mərkəzi küçələrində, adamların gur toplaşdıqları, əsasən "Eurovision-2012" mahnı müsabiqəsin keçirildiyi yerə yaxın ərazidə yerləşdiriləcək.
Multimediyalı taksofon prinsip etibarilə özündə taksofon və kompyuter funksiyalarını birləşdirən yeni aparatdır. Adi telefon xidmətləri ilə yanaşı, qurğu internet şəbəkəsinə çıxış əldə etməyə, elektron məktub göndərməyə, reklam videoçarxlarına baxmağa və s. imkan verir.
