Azərbaycan, Bakı, 16 noyabr /Trend, müxbir H.Vəliyev/
Yanvar-oktyabr ayları ərzində Azərbaycanda "Google Chrome" brauzeri bazarının payı 5,33 faiz artıb. Trend-in məlumatına görə, bu barədə cümə günü "Global Stats"ın yaydığı məlumatda deyilir.
"Google Chrome" brauzeri Azərbaycanda ən populyar brauzerdir və bazarın 40,07 faizini təşkil edir. 2011-ci ilin analoji dövrü ilə müqayisədə "Google Chrome" brauzeri bazarının payının artımı 18,58 faiz olub.
34,15 faiz payla "Opera" brauzeri ikinci yerdə qərarlaşıb. Son 10 ayda "Opera" bazarının payının artımı 0,93 faiz olub, ötən ilin analoji dövrünə nisbətən isə 3,46 faiz artıb.
"Internet Explorer" brauzeri istifadəçilərinin sayının xeyli azaldığı qeydə alınıb. "Global Stats"ın məlumatına görə, noyabrın 1-nə "Internet Explorer" bazarının payı 14,5 faiz təşkil edib ki, bu da ilin əvvəlinə olan göstərici ilə müqayisədə 4,5 faiz, 2011-ci ilin yanvar-oktyabr aylarına nisbətən isə 15,54 faiz azdır.
2012-ci ilin son 10 ayında "Mozilla Firefox" brauzerinin payı da 2,08 faiz azalıb. Hesabat dövründə "Safari" brauzerinə qoşulanların sayında 0,16 faiz artım qeydə alınıb. "Safari"nin Azərbaycanın internet-brauzer bazarındakı payı 1,38 faizdir. İnternetdə işləmək üçün digər proqramların payına 0,41 faiz düşür.
