Azərbaycan, Bakı, 1 mart /Trend, müxbir H.Vəliyev/
2014-cü ilin fevralında Azərbaycanda "ASAN imza" mobil elektron imza sertifikatlarının sayı 2 faiz artaraq martın 1-nə 23 415 ədədə çatıb. Bu barədə Trend-ə Vergilər Nazirliyindən deyiblər.
Verilən "ASAN imza" mobil elektron imzaların ümumi sayından 11 174-ü hüquqi şəxslərin, 12 174-ü fiziki şəxslərin, 67-si isə dövlət qulluqçularının payına düşüb.
Qeyd edək ki, Vergilər Nazirliyinin qərarı əsasında yaradılmış "ASAN" Sertifikat Xidmətləri Mərkəzi (ASXM) - autentifikasiya və "ASAN imza" mobil elektron imza sertifikatlarını təqdim edir və dövlət strukturları, özəl sektor və vətəndaşlar tərəfindən sertifikatların və elektron imzaların istifadəsini təmin edən digər xidmətləri həyata keçirir.
Mərkəz 2013-cü il aprelin 9-da Rabitə və İnformasiya Texnologiyaları Nazirliyi tərəfindən akkreditə edilib və dövlət hakimiyyəti, yerli özünüidarəetmə orqanları, hüquqi və fiziki şəxslərə təkmil sertifikat vermək hüququna malikdir.
