Azərbaycan, Bakı, 9 iyun /Trend, müxbir H.Vəliyev/
2014-cü il mayın 1-də Milli Sertifikat Xidmətləri Mərkəzi tərəfindən verilən elektron rəqəmsal imzaların ümumi sayı 1,57 faiz artaraq iyunun 1-də 18 998 ədəd təşkil edib. Bu barədə bazar ertəsi Trend-ə Rabitə və Yüksək Texnologiyalar Nazirliyinin Məlumat Hesablama Mərkəzindən (MHM) bildirilib.
MHM-in məlumatına görə, verilən elektron rəqəmsal imzaların ümumi sayından dövlət strukturlarının payına 12 924 ədəd düşüb, 907 ədəd hüquqi şəxslərə, 5 167 ədəd isə vətəndaşlara verilib.
"Elektron hökumət" portalına baş çəkənlərin sayı mayda 47 061 olub. Portala müraciətlərin ümumi sayı 2012-ci ilin dekabrından 2014-cü il mayın 31-dək 670 139 ədəd təşkil edib. 2013-cü ilin dekabrından 2014-cü il mayın 1-dək portaldakı elektron xidmətlərdən 1 182 764 dəfə istifadə olunub.
"Elektron hökumət" portalında (e-gov.az) təsdiq edilmiş elektron xidmətlərin sayı 428 ədəd təşkil edib və portalda 256 elektron xidmətdən istifadə etmək mümkündür. Dövlət strukturlarının saytlarında yerləşdirilən elektron xidmətlərin ümumi sayı isə 462 ədəd təşkil edir.
