2006-cı ilin yanvarında Azərpocht DM-nə yeni texniki yardım layihəsinin gerçəkləşdirilməsinə başlanılacaq. AR rabitə və informasiya texnologiyaları nazirliyində Trend ə bildirilib ki, yeni layihə BMT-nin İnkişaf Proqramının vasitəçiliyi ilə Ümumdünya Poçt İttifaqı (ÜPİ) ilə birgə həyata keçirilir.
Layihə ölkə daxilində poçt daşımalarında istifadə üçün Azərpocht Dövlət Müəssisəsinə 7 kiçik yük maşınının alınmasını nəzərdə tutur.
"Hazırda artıq bütün hüquqi məsələlər həll edilib, müvafiq saziş imzalanıb və maşınların alınmasına maliyyə ayrılıb" -deyə nazirlikdə bildirilib.
Layihənin ümumi dəyəri $130 min təşkil edir, bundan $30 min ÜPİ tərəfindən təqdim edilir, qalan hissəni isə nazirlik maliyyələşdirir.
"Alınmış maşınlar artıq gələn ilin birinci yarısında Bakıya gətiriləcək"-deyə dövlət strukturunda bildirilib.
Hazırda ölkə daxilində poçt daşımalarının əsas marşrutları bunlardır: Bakı-Gəncə-Bakı, Bakı-Qəbələ-Bakı, Bakı-Horadiz-Bakı, yardımçı marşrutlar isə Gəncə-Qazax-Gəncə, Qəbələ-Balakən-Qəbələ marşrutlarıdır.
Bundan başqa, poçt rabitəsində Naxçıvan MR-də analoji layihə həyata keçirilib.
