2006-cı ilin yanvar-avqust aylarında Naxçıvan Muxtar Respubilkasında (NMR) rabitə sahəsində müəssisə, təşkilat və əhaliyə 1658,1 min manat məbləğində xidmət göstərilib və bu, 2005-ci ilin analoji dövrü ilə müqayisədə 15% çoxdur. Bu barədə Trend ə NMR-in Bakıdakı daimi nümayəndəliyindən məlumat verilib. O cümlədən, əhaliyə 1059,3 min manat məbləğində xidmət göstərilib, bu isə 2005-ci ilin analoji dövründən 4,4% çoxdur.
Muxtar respublikanın Rabitə və İnformasiya Texnologiyaları Nazirliyi tərəfindən 2443 telefon xətti çəkilib, bu isə ötən ilin həmin dövründən 383 vahid və ya 18,6% çoxdur.
Həmin dövr ərzində NMR rabitə müəssisələrində işçilərin sayı 8136 nəfər təşkil edib və bu, 2005-ci ilin göstəricisindən 4,6% çoxdur. Hər bir işçinin orta aylıq əmək haqqı ötən illə müqayisədə 6,9% artıb və 114,7 manat təşkil edib.
Bundan əlavə NMR rabitəsi Trans-Asiya-Avropa (TAA) fibrooptik magistrala qoşulub. İki şəbəkə istismara verilib - Naxçıvan və Bakı arasında STMİ səviyyəli tranzit şəbəkə və muxtar respublikanın ərazisindəki magistral üzrə SDH şəbəkəsi.
