Microsoft Windows XP əməliyyat sisteminin Azərbaycan dilinə lokallaşdırılma prosesi başa çatmaq üzrədir. Bu barədə Trend xəbər verir. Bu gün layihənin moderatoru - Azərbaycan Prezidenti İcra aparatının informasiya resursları və texnologiyaları şöbəsinin müdiri Elmir Vəlizadə məlumat verib ki, bu günə qədər 2145 söz müzakirəyə çıxarılıb və müzakirədə 150 nəfər iştirak edib. Daxil olan təkliflərin ümumi sayı 2088, qəbul olunmuşların sayı 104-dür (38 nəfərdən).
Hazırda əvvəllər təsdiq olunmuş terminoloji lüğətə (qlossari) əsasən əməliyyat sisteminin Azərbaycan versiyası hazırlanır. Azərbaycan dilində Windows XP sisteminin son versiyası üzərində işlərin ilin sonunadək başa çatdırılması planlaşdırılır.
Azərbaycan üçün MS Windows XP əməliyyat sisteminin lokallaşdırılması layihəsinin təşəbbüsçüsü və sponsoru Microsoft şirkətidir. Microsoft məhsullarının Azərbaycan dilinə lokallaşdırılması üzrə işlər korporasiya və onun Azərbaycandakı rəsmi tərəfdaşları arasında bağlanmış müqavilələr çərçivəsində həyata keçirilir.
Bu günə qədər Microsoft korporasiyasının məhsulları dünyanın 45-dən çox dilinə tərcümə olunub və fərdi kompüterlərin əksər platformalarına uyğundur.
