Rabitə və informasiya texnologiyaları naziri Əli Abbasovun başçılıq etdiyi Azərbaycan nümayəndə heyəti Rabitə sahəsində regional birliyin (RRB) yaranmasının 15 illiyinə həsr olunmuş yubiley tədbirlərində iştirak edəcək.
Nazirlikdən Trend ə verilən məlumata görə, Rabitə Nazirliyinin nümayəndə heyəti RRB Rabitə administrasiyaları başçıları şurasının 36-cı toplantısında və RRB yanında informatizasiya üzrə MDB iştirakçı-dövlətlərinin Koordinasiya şurasının 10-cu toplantısında iştirak edəcək. Tədbirlər dekabrın 12-13-də Moskvada keçiriləcək.
Rabitə sahəsində regional birlik (RRB) 1991-ci il dekabrın 17-də yaradılıb. RRB -nin yaradılması birlik ölkələrinin rabitəçilərinə qarşılıqlı uyğunlaşdırılmış rabitə şəbəkəsinin sabit işləməsini təmin etməyə və yeni iqtisadi münasibətlərə keçid şəraitində sahənin inkişafında xeyli tərəqqiyə nail olmağa imkan verib.
Gələcək yubiley tədbirləri zamanı Moskvada Regional birliyin 15 il ərzində işinin əsas yekunlarının nəzərdən keçirilməsi və RRB fəaliyyətinin strateji istiqamətlərinin müzakirə edilməsi planlaşdırılır.
RRB Rabitə administrasiyaları başçıları Şurasının 36-cı toplantısı çərçivəsində beynəlxalq əməkdaşlığa həsr olunmuş məsələlər bloku nəzərdən keçiriləcək:
- Beynəlxalq Elektrik rabitə ittifaqının (BEİ) və Ümumdünya poçt ittifaqının (ÜPİ) Konfransının hazırlanması və keçirilməsi zamanı RRB Rabitə administrasiyalarının qarşılıqlı əlaqəsi;
- 2006-cı il noyabrın 6-dan 24-dək Antalyada (Türkiyə) keçirilən BEİ Səlahiyyətli konfransının yekunları və onun qərarlarının yerinə yetirilməsi üzrə RRB-nin vəzifələri.
- 2006-cı ilin noyabr ayında Dubayda (BƏƏ) keçirilmiş ÜPİ Strategiya konfransının yekunları, eləcə də ÜPİ -nin poçt rabitəsinin inkişafı üzrə 23-cü konqresinin qərarlarının icrasında RRB RA-nın töhvəsi.
Toplantı iştirakçıları RRB Rabitə administrasiyalarının Regional radiorabitə konfransının qərarlarının reallaşdırılması üzrə keçirdiyi tədbirləri və BEİ-nin Ümumdünya rabitə konfransına (22 oktyabr - 16 noyabr 2007-ci il) hazırlığının gedişatını müzakirə edəcəklər.
Toplantıda həmçinin RRB-də rabitə sahəsində daimi fəaliyyətdə olan nizamlayıcı orqanın yaradılması məsələlərinə baxılacaq. Ənənəvi olaraq, RRB Şurasının toplantısında təşkilatın daxili fəaliyyətinə aid məsələlər nəzərdən keçiriləcək. RRB Şurasının iş reqlamentinə əsasən toplantı iştirakçıları növbəti müddətə RRB RA başçıları Şurasının sədrini və onun müavinini təyin edəcəklər.
Dekabrın 13-də MDB formatında Rabitə administrasiyaları başçıları şurasının 36-cı toplantısı olacaq. Burada iki məsələ nəzərdən keçiriləcək:
- Rabitə sahəsində regional birliyin MDB Parlamentlərarası Assambleya Şurası ilə əməkdaşlığı;
- 2007-ci ildə Birlik iştirakçılarının maraqları çərçivəsində birgə maliyyələşdirilən elmi-tədqiqat işlərinin formalaşması və yerinə yetirilməsi.
Dekabrın 13-də həmçinin RRB yanında informatizasiya üzrə MDB iştirakçı-dövlətlərinin Koordinasiya şurasının (KŞ) 10-cu toplantısı keçiriləcək. Orada "İnformatizasiya sahəsində MDB iştirakçı-dövlətlərinin əməkdaşlıq strategiyası" və onun çərçivəsində reallaşdırılan sosial əhəmiyyətli layihələr və aşağıdakı sahələrdə əməkdaşlıq haqqında məsələnin nəzərdən keçirilməsi planlaşdırılır:
- yeni nəsil pasport-viza sənədlərinin yaranması zamanı informasiya və biometrik texnologiyaların daxil edilməsi və tətbiqi;
- RRB iştirakçı ölkələrinin birgə milli teletibb məsləhət-diaqnostika sistemlərinin yaradılması;
- 2008-ci ilə qədər MDB iştirakçı-dövlətləriniq mal və xidmətlərinin milli bazarlara irəliləməsi üçün informasiya-marketinq mərkəzləri şəbəkəsinin yaradılması üzrə Dövlətlərarası proqramın reallaşdırılması.
KŞ-nin iş reqlamentinə əsasən toplantıda Koordinasiya şurasının sədr müavini təyin olunacaq və bir sıra daxili məsələlər nəzərdən keçiriləcək.
İş toplantıları ilə yanaşı RRB yubiley tədbirlərinin proqramında həmçinin bayram tədbirləri də nəzərdə tutulub. RRB Rabitə administrasiyasının bəzi nümayəndələrinə Birliyin yaranmasının 15 illiyi münasibətilə RRB-nin Fəxri fərmanları təltif olunacaq.
RRB işçi orqanları və Rabitə administrasiyalarının təklifləri əsasında Azərbaycan tərəfdən fərmanın verilməsinə namizədlər Rabitə Nazirliyinin maliyyə, uçot və iqtisadi təhlil şöbəsinin müdiri Rəşad Nəbiyev, Rabitə Nazirliyinin poçt şöbəsinin müdiri Novruz Məmmədov, "Azərpoçt" Dövlət müəssisəsinin Baş direktor müavini Kazımov Sübhan, Rabitə Nazirliyinin poçt sektorunun baş müşaviri Həmidov Nəsir, "Azərpoçt" DM-in keyfiyyətə nəzarət və təhlükəsizlik şöbəsinin rəisi Qalayev Novruz və "AzərEkspressPoçt"-un baş mütəxəssisi Məmmədov Ağakazımdır.
