Azərbaycan Rabitə və İnformasiya Texnologiyaları Nazirliyi poçt sahəsində logistika xidmətləri göstərməyə başlayacaq. Trend nazirliyə istinadən xəbər verir ki, bu istiqamətdə Latviyanın təcrübəsi öyrənilib və marketinq tədqiqatları və daşınma vaxtlarının müəyyən olunması üzrə işlər görülür.
İlkin mərhələdə Azərpoçt Dövlət müəssisəsinin avtonəqliyyat vasitələrindən istifadə etmək məqsədəuyğun hesab olunur. Bu işdə müəyyən təcrübə əldə olunduqdan sonra və xidmətlərə marağın artdığı halda, böyük tonnajlı avtomobillərin alınması nəzərdə tutulub.
Bundan başqa, logistika xidmətlərinin təşkili üçün hüquqi əsasın yaradılması nəzərdə tutulur.
Rabitə Nazirliyinin müəssisələrindən biri olan Azərpoçt DM-in fəaliyyəti məktubların çatdırılması, teleqraf, elektron poçt, İnternet, beynəlxalq telefon danışıqları üzrə, daxili və xarici poçt göndərişləri, milli üslubda yerinə yetirilmiş açıqca və zərflərin, marka və nişanların satışı, sürətli və adi pul köçürmələrinin göndərilməsi, təqaüd və müavinətlərin ödənilməsi üzrə xidmətlərin göstərilməsindən ibarətdir.
