Azərbaycan milli rabitə peykinin buraxılması layihəsi çərçivəsində təkliflərini hazırlayıb və Beynəlxalq Elektron Rabitə İttifaqına (ITU- İnternational Telecommunication Union) təqdim edib. Bu barədə çərşənbə axşamı Trend ə Azərbaycanın Rabitə və İnformasiya Texnologiyaları Nazirliyindən məlumat verilib.
Ötən həftənin sonunda ITU-nun peyk rabitəsi üzrə ixtisaslaşan nümayəndəsi Bakıda olub və onunla bu istiqamətdə müvafiq işlər görülüb.
"Biz məhz nəyi reallaşdırmaq istədiyimizi müəyyən etdik. Təkliflərdə peykin əsas tələbatları, parametrləri, bütün lazımi göstəricilər əks olunub", - deyə idarədən bildirilib.
Təşkilat Rabitə Nazirliyinin təkliflərini nəzərdən keçirdikdən sonra, onlar tanışlıq üçün digər peyk təşkilatlarına göndəriləcəklər və sonra bu məsələyə dair öz rəylərini təqdim edəcəklər.
"Peykin orbital mövqeyinin müəyyən olunması məsələsi 2007-ci ilin noyabrında keçiriləcək Ümumdünya radio rabitəsi konfransında müzakirə olunacaq", - deyə dövlət qurumunda qeyd ediblər.
Qeyd edək ki, ötən ilin noyabr ayında Rabitə Nazirliyinin keçirdiyi iclasda peykin texniki paramertləri müzakirə olunub və yüngül çəkili peykin hazırlanması məqsədəuyğun hesab olunub.
