Azərbaycan, Bakı /müx. Trend S.Babayeva/Azərbaycanın rabitə və informasiya texnologiyaları naziri Əli Abbasovun bu yaxınlarda Latviyaya etdiyi səfər zamanı Qazaxıstan və Azərbaycan operatorları arasında Siyəzən (Azərbaycan) - Aktau (Qazaxıstan) marşrutu ilə Trans-Asiya-Avropa (TAA) fibrooptik kabel magistralının Xəzər seqmentinin tikintisinə dair protokol imzalanıb. Bu barədə nazir Abbasov məlumat verib.
Onun sözlərinə görə, imzalanan sənəd layihənin reallaşdırılmasını sürətləndirəcək.
Növbəti addım isə Ukrayna və Gürcüstanın iştirakı ilə konsorsiumun yaradılması olacaq. Məsələ ilə bağlı son qərar iyunun sonunda Bakıda qəbul ediləcək. Bu məqsədlə buraya sözügedən ölkələrin rabitə administrasiyalarının rəhbərləri dəvət olunub.
"Konsorsiumun yaradılmasının əsas tələbi protokolun imzalanması idi və biz buna nail olduq. Bundan sonra işlər sürətlə gedəcək" - deyə nazir bildirib.
Dənizin dibi ilə kabelin çəkilməsi 7-10 mln. dollara başa gələcək. Qazaxıstanla Azərbaycan arasındakı marşrutun uzunluğu 380 kilometr təşkil edir. Hazırda mövcud marşrut Türkmənistan və İran ərazisi ilə keçir.
Azərbaycan Rabitə Nazirliyində hesab edirlər ki, TAA kabelinin Azərbaycandan keçməsi əsl sensasiya olacaq. Çünki bunun nəticəsində marşrutun uzunluğu 2000 kilometr azalacaq və nəticədə bu, informasiyanın ötürülməsi trafikini gücləndirəcək.
Xəzər hissəsindən başqa TAA kabelinin Şanxaydan tutmuş Frankfurtadək bütün seqmentlərində inşa işləri artıq başa çatıb və kabel vasitəsilə informasiya mübadiləsi İran və Rusiya ərazisi ilə həyata keçirilir.
Layihə Orta Asiyaya telekommunikasiya tranziti vasitəsilə Azərbaycandan birbaşa Türkiyəyə çıxış etmək imkanı qazandıracaq. Eyni ilə Azərbaycan, Türkiyə, Gürcüstan və digər ölkələr Qazaxıstan vasitəsilə Çinlə əlaqə yarada biləcəklər.
