Azərbaycan, Bakı/ Trend müxbir S.Babayeva/ Azərbaycan, Qazaxıstan, Ukrayna, Türkiyə və Gürcüstan Siyəzən (Azərbaycan) - Aktau (Qazaxıstan) marşrutu üzrə Xəzər seqmenti Trans - Asiya - Avropa fibrooptik kabelinin çəkilməsini müzakirə etmək üçün görüşün tarixini dəqiqləşdirir. Bu barədə Aztelekom İB-nin baş direktoru Məhəmməd Məmmədov məlumat verib.
Daha öncə Rabitə və İnformasiya Texnologiyaları Nazirliyindən bildirilmişdi ki, iyunun sonunda Bakıda rabitə qurumlarının iştirakı ilə görüş keçirilməsi planlaşdırılır. Planlaşdırılan görüşdə Ukrayna Gürcüstan və Türkiyənin iştirakı ilə konsorsiumun yaradılması müzakirə olunacaq.
Rabitə Nazirliyinin nümayəndə heyətinin Latviyaya səfəri zamanı Azərbaycan və Qazaxıstan operatorları arasında protokol imzalanıb.
Sənədi Azərbaycanın Rabitə Nazirliyinin Beynəlxalq əlaqələr və hesablamalar mərkəzi və KazTransCom (Qazaxıstan) imzalayıb. Protokola əsasən, layihənin xərcləri Azərbaycan və Qazaxıstan arasında yarıbayarı bölünüb.
Dənizin dibi ilə kabelin çəkilməsi təqribən 7-10 mln. dollar təşkil edəcək.
Qazaxıstan və Azərbaycan arasındakı marşrutun uzunluğu isə təqribən 380 km təşkil edəcək. Hal-hazırda mövcud marşrut Türkmənistan və İrandan keçməklə Azərbaycan ərazisindən yan keçir.
Rabitə Nazirliyində hesab edirlər ki, TAA kabelinin Azərbaycandan çəkilməsi əsl sensasiya olacaq. Belə ki, bu yolla kabelin uzunluğu 2000 km qısalacaq. Nəticədə məlumatın ötürülməsi sürətlənəcək.
Layihə Mərkəzi Asiya telekommunikasiyasına Azərbaycandan keçməklə birbaşa Türkiyə ilə əlaqə yaratmağa imkan verəcək. Müvafiq olaraq Azərbaycan, Türkiyə və Gürcüstan Qazaxıstan vasitəsilə Çinlə əlaqə yarada biəcək.
