Azərbaycan, Bakı, 24 noyabr /Trend, müxbir İ.Xəlilova/
"Azəryolservis" ASC məsləhətçi firmaları Azərbaycanda yol tikintisi üçün Asiya İnkişaf Bankının (AİB) multitranş maliyyələşdirilməsinin birinci tranşı çərçivəsində proqram idarəçiliyi üzrə maraqların ifadə olunması sorğusuna dəvət edir.
Trend-in məlumatına görə, bu barədə şənbə günü ASC-nin rəsmi mətbuatda dərc edilən məlumatında deyilir.
Proqram idarəçiliyi üzrə məsləhətçi "Azəryolservis"in tərkibində fəaliyyət göstərən layihə idarəetmə qrupları (LİQ) üçün xidməti və digər ixtisaslaşdırılmış təlimlərin keçirilməsi ilə ASC-nin iş potensialının, eləcə də gələcəkdə LİQ tərəfindən proqramdan sərbəst şəkildə istifadəni təmin etmək məqsədilə avtomobil yollarının layihələndirilməsi, satınalma, tikintiyə nəzarət, texniki xidmətin göstərilməsi, ekoloji və sosial təhlükəsizlik, maliyyə idarəetməsi, müqavilə və layihənin idarə olunmasında ümumi tədbirlərin həyata keçirilməsi üçün bacarıqların gücləndirilməsinə cavabdeh olacaq.
Proqram idarəçiliyi üzrə məsləhətçi layihə və proqramın idarə edilməsi üçün hesabatların Nəqliyyat Nazirliyi və AİB-ə təqdim edilməsində ASC-yə kömək göstərəcək.
Nəzərdə tutulan işlər 2013-cü ilin aprel ayından gec olmayaraq başlanmalı və 2016-cı ilin aprel ayınadək tamamlanmalıdır.
AİB-ə üzv olan ölkələrdən maraq göstərən məsləhətçi firmalar əlavə məlumatları yerli vaxtla saat 10:00-dan 16:00-dək aşağıda qeyd edilmiş ünvandan ala bilərlər: "Azəryolservis" ASC, Üzeyir Hacıbəyov küçəsi, 72/4
Telefon/faks: (+99412) 4936009
Elektron üvanı: [email protected]
Təkliflər dekabrın 20-dən gec olmayaraq təqdim edilməlidir.
