Azərbaycan, Bakı, 25 avqust /Trend, müxbir Zülfiyyə Qurbanova/
Əmlak Məsələləri Dövlət Komitəsi "Neftçala-Pambıq" ASC-nin səhmlərinin 30,11 və "Qarabağ-Pambıq" ASC-nin səhmlərinin 29,45 faizinin satışı ilə bağlı investisiya müsabiqəsi elan edib.
Trend-in "Mülkiyyət" qəzetinə istinadən verdiyi məlumata görə, müsabiqədə Azərbaycanın fiziki və hüquqi şəxsləri, habelə xarici investorlar iştirak edə bilərlər.
"Neftçala-Pambıq" ASC-nin səhmlərinin satışı üzrə müsabiqədə iştirak etmək istəyənlər investisiya proqramını təqdim etməlidirlər. Proqrama istehsalın təkmilləşdirilməsi, təmir və mövcud tikililərin, avadanlıq və qurğuların yenilənməsi üzrə təklif, investisiya təklifinin dəyərinin 5 faizi həcmində bank zəmanəti, dövlət büdcəsinə 286 min manatın ödənilməsi üzrə təklif daxildir.
Həmçinin "Qarabağ-Pambıq" ASC-nin səhmlərinin satışı üzrə müsabiqədə iştirak etmək istəyənlər investisiya proqramını təqdim etməlidirlər. Proqrama istehsalın təkmilləşdirilməsi, təmir və mövcud tikililərin, avadanlıq və qurğuların yenilənməsi üzrə təklif, investisiya təklifinin dəyərinin 5 faizi həcmində bank zəmanəti, dövlət büdcəsinə 245 min manatın ödənilməsi üzrə təklif daxildir.
"Neftçala-Pambıq" ASC-nin səhmlərinin alışı üzrə iddiaçı niyyətinin ciddiliyini təsdiq etmək üçün istənilən bankın 90 min, "Qarabağ-Pambıq" ASC-nin səhmlərinin alışı üzrə iddiaçı isə 80 manat dəyərində təminatlı məktubunu təqdim etməlidir.
ASC-lərin hər birinin ştatı 4 nəfərdir.
"Neftçala-Pambıq" pambığın qəbulu, emalı və satışı ilə məşğul olur. ASC-nin nizamnamə kapitalı 3,53 milyon manat təşkil edir və bu məbləğə hər birinin nominal dəyəri iki manat olmaqla 1 763 915 ədəd sənədsiz, adlı səhm daxildir.
2014-cü il avqustun 1-də müəssisənin öhdəlikləri 1,28 milyon manat, borcu isə 719 manat təşkil edib.
Müsabiqədə ümumi nominal dəyəri 1 062 322 manat olan 531 161 ədəd səhm satışa çıxarılıb.
"Qarabağ-Pambıq" pambığın qəbulu, emalı və satışı ilə məşğul olur. ASC-nin nizamnamə kapitalı 3,08 milyon manat təşkil edir və bu məbləğə hər birinin nominal dəyəri iki manat olmaqla 1 541 349 ədəd sənədsiz, adlı səhm daxildir.
Müsabiqədə ümumi nominal dəyəri 907 744 manat olan 453 872 ədəd səhm satışa çıxarılıb.
İddiaçılar ətraflı məlumatı hər gün saat 10:00-dan 17:30-dək Y.Səfərov, 50 ünvanından ala bilərlər.
Təkliflər 22 sentyabr saat 10:00-dan 17:30-dək qəbul edilir.
"Neftçala-Pambıq" ASC üzrə təkliflərin qiymətləndirilməsi müsabiqə komissiyası tərəfindən Komitənin binasında 24 sentyabr saat 12:00-dan, "Qarabağ-Pambıq" ASC üzrə isə 24 sentyabr saat 15:00-dan aparılacaq.