Azərbaycan, Bakı, 16 mart /Trend, müxbir E.İsmayılov/
Yaxın vaxtlarda ARDNŞ və Almaniyanın E.ON şikəti Bakı və Abşeron yarımadasının paylayıcı qaz sisteminin yenidən qurulması və modernləşdirilməsi layihəsi çərçivəsində birgə müəssisənin yaradılmasına dair anlaşma memorandumu imzalayacaqlar. Bu barədə çərşənbə günü "Azəriqaz" İB-nin rəhbəri Əkbər Hacıyev deyib.
"Memorandum martın sonu - aprelin əvvəlində imzalanacaq", - Hacıyev bildirib.
Bu birgə müəssisə layihənin texniki-iqtisadi əsaslandırmasını hazırlayacaq və maliyyə mənbələrini müəyyənləşdirəcək. Gözlənilir ki, cari ilin sonuna layihənin həyata keçirilməsi üzrə müqavilə imzalanacaq.
Bakı və Abşeron yarımadasının qaz sistemi ölkədə ən böyüyüdür və 650 minə yaxın abonenti əhatə edir. Onun yenidən qurulması və modernləşdirilməsi üçün mövcud infrastrukturun 90 faizi yenilənməlidir.
Ümumilikdə layihənin həyata keçirilməsinə 800-900 milyon avro xərclənə bilər.
