Azərbaycan, Bakı, 21 may / Trend , müxbir C.Babayeva/ Gürcüstan parlamentinə azərbaycanlı namizədlər şanslarını yüksək qiymətləndirmirlər. Gürcüstanın müxtəlif partiyalarının həm majoritar, həm də proporsional siyahılarında 14 azərbaycanlının namizədliyi irəli sürülüb.
Gürcüstanın "Xristian-Demokrat Alyansı" partiyasından namizədliyi irəli sürülmüş "Gürcüstan naminə" partiyasının sədri Fazil Əliyev və Respublika Partiyasından namizədliyi irəli sürülmüş "Gürcüstan mənim vətənimdir" İctimai Birliyinin sədri Əli Babayevin çərşənbə günü telefonla Tbilisidən Trend -a bildirdiklərinə görə, parlament seçkiləri qeyri-demokratik şəraitdə keçirilib.
Əliyevin sözlərinə görə, ilkin məlumatlara əsasən, azərbaycanlıların sıx yaşadığı regionların bəzi seçki məntəqələrində hakim partiya məğlub olub.
"Azərbaycanlıların yaşadığı regionlarda əsas mübarizə hakim partiyanın namizədi ilə mənim namizədliyim arasında gedib. Hakimiyyətin hər seçkidə ən çox etibar etdiyi və pozuntuların daha çox yer verildiyi bölgə Kvemo-Kartli olub".
Deputatlığa namizədin bildirdiyinə görə, majoritar siyahıda imkanları məhdud olsa da, proporsional siyahı üzrə parlamentə keçmək imkanları var.
Onun sözlərinə görə, Kvemo-Kartli regionunun seçki məntəqələrindəki xarici müşahidəçilər seçkini bütövlükdə izləməyibəlr. "Əsas seçki pozuntuları müşahidəçilərin məntəqələrdən uzaqlaşdığı məqamlarda qeydə alınıb",- deyə Əliyev qeyd edib.
Respublika Partiyasının namizədi Əli Babayevin sözlərinə görə, seçicilərlə görüş zamanı parlamentə keçmək ümidi daha çox idi.
"Azərbaycanlıların yaşadığı Qardabani rayonunda seçici hüquqna malik olanların 60 faizi ölkədən kənardadır. Bu regionda hakimiyyət yalnız seçki pozuntuları nəticəsində qələbə qazanacaq. Demokratik prinsiplərə cavab verməyən parlament seçkisində biz qələbəni əldən verdik",- deyə Babayev bildirib.
Babayevin sözlərinə görə, seçki yalnız Qardabanidə yox, bütün Gürcüstanda qeyri-demokratik şəraitdə keçib.
"Seçki məntəqələrində azərbaycanlı namizədlərin müşahidəçiləri məntəqədən uzaqlaşdırılıb. 20-dək məntəqədə müşahidəçilər məntəqəyə buraxılmayıb. Azərbaycanlı seçicilərə məntəqələrdə təzyiqlər göstərilir", - deyə Babayev qeyd edib.
Onun bildirdiyinə görə, Gürcüstan parlamentinə yalnız hakim partiyadan namizədlikləri irəli sürülmüş azərbaycanlıların keçəcəyi gözlənilir.
Azərbaycanlı namizədlərin qeyd etdikləri kimi, onlar "exitt-poll"un nəticələrini etiabarsız hesab edəcəklər.