Azərbaycan, Bakı, 19 avqust, Trend , müxbir D.Xatınoğlu, G.Əhmədova/ Pakistan prezidenti Pərviz Müşərrəfin hakimiyyətdə və xalq arasında nüfuzunu itirməsini nəzərə alsaq, onun istefasının ölkədə sabitliyin yaranmasında rolu çox olacaq. "Müşərrəf istefa verməklə ən düzgün seçim edib" - deyə, Pakistanın daxili işləri üzrə ekspert Əbdulənis Həy Trend -a bildirib.
Pakisan prezidenti Pərviz Müşərrəf doqquz illik hakimiyyətdən sonra avqustun 17- də istefa verib.
Həy, Pakistanın Müşərrəfdən sonrakı vəziyyəti ilə bağlı hesab edir ki, Müşərrəfin istefasından sonra, hakim koaliasiyanın hansı qərara gəlməsi və kimin prezident seçilməsi Pakistan xalqını son dərəcə narahat edib. Onun sözlərinə görə, Müşərrəfin prezidentlik dövründə müxalifətdə olan Xalq partiyası ilə Müslim-Liq partiyasının Nəvaz Şərif qolu Müşərrəfin əleyhinə birləşmişdilər, lakin Müşərrəfin istefasından sonra bu həmrəyliyin davamı olmayacaq. "Xalq və Müslim-Liq (Nəvaz Şərif qolu) partiyaları Müşərrəfin hakimiyyətindən əvvəl bir-birinə rəqib olublar və fikir ayrılıqları hələ də davam edir" - deyə, Ənis çərşənbə axşamı telefonla İslamabaddan bildirib. O, hesab edir ki, hakim koaliasiyaya daxil olan partiyalar hiss etsələr ki, özləri birbaşa ölkəni idarə edə bilərlər, digər müttəfiq partiyaları sıradan çıxarmağa çalışacaqlar.
Digər pakistanlı ekspert, Guaid-i Azam Universitetinin siyasi elmlər üzrə professoru Tariq Rəhman Trend -a bildirib ki, Müşərrəfin istefası Pakistanda demokratiyanı gücləndirəcək və koalisiyanı parçalanmadan xilas edəcək. Bu, Müşərrəfyönlü dairələrin qüvvəsini zəiflədir. "Prezidentin istefası, keçən il vəzifələrindən uzaqlaşdırılmış hakimlərin yenidən vəzifələrinə qayıtmasına da imkan yaradacaq".
Hazırda Pakistanın hakim koaliasiyasına üzv partiyalar prezident seçkilərilə bağlı iclas keçirirlər. Pakistan mətbuatının yaydığı məlumata əsasən, hakim koalisiya 24 saatadək vəzifələrindən uzaqlaşdırılmış hakimlərlə bağlı son qərar çıxarmalıdır.
Bu haqda Rəhman bildirib ki, hakimlərin işlərinə qayıtma məsələsində Xalq və Müslim-Liq partiyaları arasında həmrəylik var, lakin digər məsələlər üzrə bu həmrəylik hiss olunmur.
Müşərrəf diktator hesab edilə bilər. Onun siyasətini təqdir edənlər də ola bilər, amma ictimai rəy hələ xeyli müddət onun əleyhinə olacaq".
Əfqanıstanın Ava Agentliyi, ABŞ - da nəşr olunan News Week qəzetinə istinadən, Müşərrəfin tezliklə Səudiyyə Ərəbistanına gedəcəyi barədə məlumat verib.
Bu haqda Həy bildirib ki, ölkədə, rəsmilərdən tutmuş hərbçilərədək, Müşərrəfin əleyhinə məhkəmə işi qaldırmağa çalışırlar. Onun sözlərinə görə, keçən il, Ləl məscidində radikal müsəlmanların dinc adamları girov götürməsi və bununla bağlı hakimiyyətin qanlı əməliyyatlari, Bəluçistan regionunda bəluçlara qarşı hərbi əməliyyatlar və digər məsələlərə görə, xalq da Müşərrəfi məhkəməyə verməyə meyllidir. "Müşərrəf tezliklə ölkədən çıxmalı və bu qalmaqala son qoymalıdır" - deyə, Həy hesab edir.
Məqalə müəllifi ilə əlaqə saxlamaq üçün elektron ünvan [email protected]
