RED: İ.Doğramaçının həyatı haqqında üçüncü abzasdan sonraya əlavə olunub
Türkiyə-Azərbaycan Dostluq və Əməkdaşlıq Vakfının rəhbəri İhsan Doğramaçı ömrünün 95-ci ilində vəfat edib. Bu barədə CNN Türk telekanalı məlumat verib.
Ümumdünya Pediatrlar Şurasının həqiqi üzvü, dünya şöhrətli türk pediatrı, Bilkent və Kocatəpə universitetlərinin banisi olan və Ümudünya Səhiyyə təşkilatı çərçivəsində "İhsan Doğramaçı adına Ailə Sağlamlıq Fondu"nun təsisçisi İhsan Doğramaçı vəfat edib.
Doğramaçı Türkiyə -Azərbaycan münasibətlərinin inkişafına böyük töhfə verib və Azərbaycanı regionun "parlaq ulduzu" adlandırıb.
Doğramaçı poliorqan çatışmazlığı nəticəsində Kocatəpə Universitetinin xəstəxanasında dünyasını dəyişib.
Məşhur türk alimi 1915-ci il aprelin üçündə İraqın Ərbil şəhərində iraqlı türkmən ailəsində anadan olub. İstanbul universitetinin tibb fakultəsini bitirdikdən sonra Ankara xəstəxanalarının birində təcrübə keçib. 1949-cu ildə Ankara universitetinin tibb fakultəsinin dosenti, 1954-cü ildə isə professoru olub. Müxtəlif illərdə Ankara universitetinin, Yaxın Şərq Texniki universitetinin rektoru vəzifəsin tutub, Paris universitetində dərs deyib. 1964-1973-cü illərdə Avropa Rektorları Konfransının İdarə Heyətinin üzvü, 1981-ci ilin sonlarından idarə heyətinin komitəsində "Ali təhsil üzrə Beynəlxalq Konfrans"ın üzvü olub.
1985-ci ildə ilk özəl türk universiteti olan Bilkent universitetinin əsasını qoyan Doğramaçı Hindistan, Fransa Milli Tibb Akademiyasının, ABŞ Pediatrlar Akademiyasının, Azərbaycan Milli Elmlər Akademiyasının fəxri üzvü olub, fərqli ölkələrdə çoxsaylı mükafatlarla təltif olunub.
Bilkent universitetinin hazırkı rektoru onun oğlu porfessor Əli Doğramaçıdır. Türk dili ilə yanaşı Doğramaçı ingilis, fransız, alman, ərəb və fars dillərində danışa bilirdi.