Martın 11-də dağıdıcı zəlzələdən və ondan sonra baş verən sunamidən ciddi ziyan çəkən Fukusima prefekturası ərazisində bu gün 5,3 maqnitudalı yeraltı təkanlar qeydə alınıb. Trend-in məlumatına görə, bu barədə bazar ertəsi ABŞ Geologiya Xidmətinin (USGS) saytı xəbər verib. Məlumatı RİA Novosti yazır.
Xidmətin bildirdiyinə görə, yerli vaxtla 14:08-də 5,3 maqnitudalı yeraltı təkanlar qeydə alınıb. Zəlzələnin ocağı 17,8 kilometr dərinlikdə, episentri İvaki şəhərinin (Fukusima prefekturası) cənub-şərqinin 116-cı, paytaxt Tokionun şimal-şərqinin 176-cı kilometrliyində olub.
5,2 maqnitudalı ikinci zəlzələ yerli vaxtla saat 14:54-də baş verib. Zəlzələnin ocağı 37,1 kilometrdə, episentri isə Fukusima prefekturasının İvaki şəhərinin 143-cü kilometrliyində olub.
Sunami təhlükəsi elan edilməyib. Zərərçəkənlər və dağıntılar haqqında məlumat yoxdur.