Gürcüstan, Tbilisi, 9 may /Trend, müxbir N.Kirsxaliya/
"Biz istəyirik ki, Gürcüstan azərbaycanlıları Gürcüstanda uğurlu şəxslər olsunlar". Bu gün Gürcüstan Prezidenti Mixail Saakaşvili Kutaisidə Jvaniya adına Məmurların İnzibatçılıq Məktəbindəki görüşdə bəyan edib.
Gürcüstan Prezidenti orada gürcü dilində təhsil kursu keçən 80 azərbaycanlı ilə görüşüb.
"Əlbəttə ki, azərbaycanlılar ilk növbədə, öz ana dillərini, sonra isə gürcü dilini bilməlidirlər. Bu da onlar üçün gürcülərlə bərabər imkanlar yaradır. Bu, Gürcüstandakı bütün milli qruplara aiddir", - o qeyd edib.
Saakaşvili son vaxtlar azərbaycanlılar və digər etnik qrupların nümayəndələri arasında dövlət dilinin öyrənilməsinə daha artıq meylin meydana çıxmasından məmnunluğunu ifadə edib. "Bu tendensiyalar Gürcüstanın burada yaşayan etnik qruplara məxsus olması ilə bağlı elan etdiyimiz prinsiplərin həyata keçdiyini göstərir", - o deyib.
Görüşün sonunda Saakaşvili Məmurların İnzibatçılıq Məktəbində təhsil alan azərbaycanlılara uğurlar diləyib.