Azərbaycan, Bakı, 22 sentyabr /Trend, müxbir A.Tağıyeva/
İraq hətta ABŞ qoşunlarının ölkəni tərk etməsindən sonra da amerikalı hərbi təlimatçılara ehtiyac duyacaq. Bunu İraqın xarici işlər naziri Huşyar Zibari bəyan edib. Trend-in məlumatına görə, xəbəri "Əl-Cəzirə" telekanalı yayıb.
Nazirin sözlərinə görə, İraq ABŞ-la hərbi hazırlıq sahəsində əməkdaşlıq haqqında sazişin imzalanması imkanlarına baxır və ABŞ-dan F-16 qırıcıları və digər silahların alınmasını planlaşdırır.
Amerika qoşunları İraqdan əvvəlcədən müəyyən olunmuş qrafik üzrə, yəni 2011-ci ilin sonunadək çıxacaqlar. Bu barədə İraqın vitse-prezidenti Hüdeyr əl-Xuzayi ABŞ səfiri Ceyms Cefri ilə Bağdadda keçirdiyi görüşdən sonra bəyan edib.
Öz növbəsində Cefri də bildirib ki, "ABŞ hökuməti öz qoşunlarını İraqdan İraq hökuməti ilə imzalanan sazişə uyğun olaraq, cari ilin sonunadək çıxarmağa cəhd göstərir".
Bağdadla Vaşinqton arasında 2008-ci il noyabrın sonlarında imzalanan təhlükəsizliyə dair sazişə uyğun olaraq, ABŞ öz qoşunlarını İraq ərazisindən 2011-ci il dekabrın 31-dən gec olmayaraq çıxaracaq.
