Azərbaycan, Bakı, 16 mart / Trend, müxbir S.İsayev /
ABŞ Dövlət Departamenti hesab edir ki, İrana qarşı sanksiyalar yalnız o halda götürülə bilər ki, İran beynəlxalq ictimaiyyətlə özünün nüvə proqramı ilə bağlı narahatlıq barədə tam əməkdaşlıq etsin. Bu barədə ABŞ Dövlət Departamentinin İran üzrə rəsmi nümayəndəsi Alan Eyer Trend BİA-nın Fars xəbərlər xidmətinin rəhbəri Dalğa Xatınoğluya bildirib.
Alan Eyer ABŞ Dövlət Departamentinin İran ətrafındakı son hadisələrə həsr olunmuş internet konfransda iştirak edib. Dalğa Xatınoğlu ilə yanaşı, tədbirə dünya KİV-inin dörd başqa jurnalisti də dəvət olunub. Konfrans Google+ Hangout servisi vasitəsilə keçirilib.
Fevralın ikinci yarısında BAEA-nın nümayəndə heyəti İranda olub, lakin onlara Parçin hərbi obyektinə baş çəkməyə icazə verilməyib. İran hakimiyyəti BAEA müfəttişlərinin hərbi obyektə daxil olmalarına icazə verməyərək bunun üçün Nüvə silahının yayılmamasına dair Müqaviləyə əlavə protokolun və tərəflər arasında xüsusi razılığın lazım olduğunu bəyan edib.
"Əlavə protokolun olub-olmamasının heç bir fərqi yoxdur. Əgər İran heç bir hərbi aspekt gizlətmirsə, ölkə tam şəkildə beynəlxalq birliklə əməkdaşlıq etməlidir", - Eyer deyib.
İran XİN-in rəsmi nümayəndəsi Ramin Mehmanpərəstin sözlərinə görə, İran BAEA müfəttişlərinə Parçinə baş çəkməyə icazə verməyə hazırdır, lakin bu, yalnız onların səfəri üçün hüquqi əsasın müəyyən edilməsindən sonra mümkündür.