Azərbaycan, Bakı, 22 avqust /Trend, müxbirlər T.Cəfərov, E.Tarıverdiyeva /
İran hökuməti Şərqi Azərbaycan vilayətində zəlzələdən zərər çəkənlərə yaşayış evlərinin tikintisi və bərpası üçün 49 milyon dollar ayırıb. Bu barədə İranın daxili işlər naziri Mustafa Məhəmməd Nəccar bildirib. Trend-in məlumatına görə, bu barədə çərşənbə günü MEHR agentliyi xəbər verib.
Zəlzələdən zərər çəkənlər üçün vəsaitin ayrılması ölkə Prezidenti Mahmud Əhmədinejad və Nazirlər Kabineti tərəfindən bəyənilib.
Avqustun 11-də İranın Şərqi Azərbaycan əyalətində (əsasən Əhər, Vərzəqan və Həris şəhərlərində) 6,2 bal gücündə baş vermiş zəlzələ nəticəsində 300 nəfər ölüb, 2500 yaxın adam xəsarət alıb.
Əyalətdə 538 kənddən 110-u qismən və ya tamamilə dağılıb. Təxminən beş min bina zərər görüb.
Son məlumatlara görə, zəlzələ nəticəsində 306 nəfər həlak olub, 3 mindən artıq insan yaralanıb.
Məhəmməd Nəccar əlavə edib ki, ümumilikdə istiqraz şəklində 347 min dollara yaxın vəsait zəlzələdən zərər çəkmiş rayonların bərpasına ayrılıb.
Bundan başqa, zəlzələdən zərər çəkmiş hər ailəyə 4 min dollar veriləcək.